Në një konferencë për mediat të zhvilluar ditën e sotme në përfundim të misionit të saj diplomatik në Shqipëri, ambasadorja Yuri Kim është pyetur nga gazetarët se a duhet të largohen muxhahedinët nga Shqipëria.
Kim u përgjigj se ky është një vendim që i përket qeverisë shqiptare duke theksuar se SHBA mbështet të drejtën e Shqipërisë për të zbatuar ligjet e saj në vendin e saj.
“Mendoj se është një vendim që duhet ta marrë qeveria shqiptare, por një gjë është shumë e qartë që ne mbështesim të drejtën e Shqipërisë për të zbatuar ligjet e saj në vendin e saj. Ka terma të caktuar që zbatohen për çdo lloj mysafiri në vendin tuaj dhe këto duhet të zbatohen prej tyre”- tha Kim.
Policia kontrolloi dje me urdhër të SPAK dhe GJKKO kampin e muxhahedinëve në Manzë të Durrësit dhe sekuestroi kompjutera dhe servera prej të cilave dyshohet se janë kryer sulme kibernetike ndaj institucioneve të huaja./Opinion.al
