Rekomandimet e Komisionit të Venecias, sipas ekspertëve të Partisë Demokratike, shmangin kapjen e sistemit të drejtësisë nga politika. Në një dalje përpara gazetarëve, gjatë prezantimit të 8 rekomandimeve, ata pohuan se draft – raporti i Venecias duhet të jetë udhërrëfyes për reformën në drejtësi.
Ajo që lind si domosdoshmëri, argumentojnë ekspertët demokratë pas rekomandimeve të Komisionit të Venecias, është hartimi i një drafti të ri. Puna duket se ka nisur edhe me përfaqësuesit e Ambasadës Amerikane.
Opozita thotë se si shembull për këtë proces, Venecia sugjeron të ndiqet shembulli i dialogut mes palëve për dekriminalizimin.
Ekspertët demokratë thanë se, Komisioni i Venecias nuk e ka mbyllur derën për zgjedhjen me 94 vota të përfaqësuesve në institucioneve kushtetuese, mes të cilave edhe anëtarët e Gjykatës Kushtetuese, KLD -së, apo Prokurorit të Përgjithshëm.
Pak ditë më parë, Venecia rekomandoi se e gjithë skema institucionale e organeve të sistemit të drejtësisë duhet të rishikohet dhe thjeshtohet.
