Një 49-vjeçar shqiptar ka humbur jetën në vendin e punës në ishullin e Mykonos në Greqi.
Mësohet se punëtori shqiptar ishte duke kryer lyerje vaji në murin e jashtëm të ndërtesës kur ra nga skela nga një lartësi rreth 2 metra duke humbur jetën në vendin e ngjarjes. Trupi i tij i pajetë u gjet pak më vonë nga djali i tij, i cili po punonte me të dhe ishte larguar nga vendi i ngjarjes pak më parë për të çuar disa mjete në makinë.
49-vjeçar shqiptar kishte shkuar në Mykonos dy vite më parë me familjen për një të ardhme më të mirë. Tashmë trupi i pajetë i punonjësit shqiptar do të transferohet në mjekësinë ligjore të Pireut me urdhër të zv/prokurorit të Gjykatës së Rrethit Siros.
Fotot e siguruara nga “protothema.gr” tregojnë qartë grumbullin e materialeve të ndërtimit mbi të cilat ka rënë ndërtuesi shqiptar në rrethana të paqarta. Në pamje të parë shihet se në ndërtimin e kontraktorit të madh nuk janë respektuar masat e nevojshme të sigurisë.
