Teksa komentoi 2 kërkesat që janë depozituar në KQZ nga dy palët brenda Partisë Demokratike për anëtarë të KZAZ-ve, kryekomisioneri Ilirjan Celibashi theksoi se për KQZ ka vetëm një Parti Demokratike.
Ai theksoi se përçarja brenda PD duhet të zgjidhet pasi flitet për partinë kryesore të opozitës.
Sipas Celibashit nuk mund të pretendohet sikur nuk ndodh asgjë nëse PD nuk regjistrohet në zgjedhje.
“Kërkesa si për rastin e komisionit dhe regjistrimin e subjekteve zgjedhore është kërkesë që do vlerësohet në pëputhje me ligjin. Ne nuk vendosim se kush udhëheq PD dhe tej çdo spekulimi kjo është e qartë për gjithkënd. Për ne ka një PD, është në person juridik që ka emrin PD e Shqipërisë. Ngelet për t’u parë se kush e ka tagrin për të vepruar dhe për llogari të PD. E dimë që dikush thotë që kjo e drejtë i takon z.Berisha, dikush tjetër thotë jo i takon z.Alibeaj pasi ai e ka të deleguar nga z.Basha, do ishte mirë që kjo çështje të ishte zgjidhur dhe mendoj që do duhet të zgjidhet sepse flasim për një interes publik të dorës së parë, flitet për partinë kryesore të opozitës dhe mendoj sa nuk është vonë gjithkush mund të kontribuojë në zgjidhjen e kësaj situate, sa nuk është vonë të japi kontributin e vetë që kjo çështje të zgjidhet si do duhet të zgjidhet. Nuk është KQZ që vendos për disa çështje që nuk i ka kompetencë. Nuk mundet që ne të bëjmë sikur s’do ndodhi asgjë nëse partia kryesore e opozitës mund edhe të mos regjistrohet ose mund edhe të regjistrohet jo sipas parashikimeve që dikush që mund të impaktojë jetën politike të vendit nuk ka marrë atë vendim”-tha Celibashi.
