Presidentja e Kosovës Vjosa Osmani ka deklaruar se roli i presidentit të Turqisë, Recep Tayyip Erdogan, do të ishte i rëndësishëm në dialogun Kosovë-Serbi.
Sipas Osmanit, Erdogan do të mund ta bindte presidentin e Serbisë, Aleksandar Vuçiç, që shteti fqinj ta njohë Kosovën.
“Besoj se presidenti Erdogan mund të ketë një rol shumë të rëndësishëm për të bindur Vuçiçin se e vetmja rrugë përpara për paqe dhe stabilitet në Ballkanin Perëndimor është që Serbia ta njohë Kosovën. Kjo është një zgjidhje e përbashkët, sepse kjo në fakt sjell paqe afatgjatë. Ne duhet të punojmë për këtë dhe besoj se roli i presidentit Erdogan është i rëndësishëm, por në të njëjtën kohë e dimë se dialogu tani është i udhëhequr nga BE. Janë arritur disa marrëveshje, por i vetmi problem është që Serbia nuk i zbaton marrëveshjet. Dhe besoj se këtu presidenti Erdogan mund ta bindë Vuçiçin që të mbajë premtimet”, tha Osmani në një intervistë për televizionin shtetëror turk, TRT Ëorld.
Presidentja po ashtu tha se marrëdhëniet e Kosovës dhe Turqisë janë në nivel shumë të lartë.
“E shkëlqyeshme, marrëdhëniet e Kosovës dhe Turqisë, dhe po ashtu marrëdhëniet e mia dhe bashkëpunimi i ngushtë me presidentin Erdogan janë në nivel shumë të lartë. Dhe do të doja ta falenderoj Turqinë dhe presidentin për mbështetjen”, shtoi Osmani.
