Irani posedon dronë të armatosur të cilët nuk kapen nga radrët dhe mund të përdoren për të goditur kampin e muxhahedinëve në Shqipëri (MEK). Kështu shkruan gazeta shtetërore iraniane.
“Dronët iranianë dhe sistemet e raketave nuk janë të limituara në aspektin gjeografik, përsa i përket vendeve fqinje. Përkundrazi, Irani gëzon aq shumë aftësi në sektorin e hapësirës ajrore, veçanërisht në fushën e dronëve, saqë mund të synojë lehtësisht bazën e MKO në Tiranë”, shkruan gazeta zyrtare e qeverisë, Iran.
“Irani ka dronë të fshehtë vetëvrasës dhe luftarak që mund të udhëtojnë përtej distancës midis Iranit dhe Shqipërisë dhe të godasin objektivin”, shtoi e përditshmja.
Gazeta zyrtare e qeverisë preku gjithashtu një deklaratë të lëshuar nga Ministria e Inteligjencës e Iranit, në të cilën ajo ka theksuar rolin e MKO-së në trazirat e fundit në disa qytete iraniane.
Në deklaratë, ministria njoftoi se disa nga protestuesit e arrestuar janë anëtarë të MKO-së.
“Sipas ligjit ndërkombëtar, kur një grup terrorist rrezikon haptazi sigurinë e një vendi dhe pranon haptazi veprimet e tij, ai vend ka të drejtë legjitime të shënjestrojë bazën dhe anëtarët e atij grupi, saktësisht të ngjashme me atë që ndodhi në rajonin verior të Irakut kundër grupeve terroriste, të vendosur atje, apo çfarë ndodhi kundër grupit terrorist ISIS në Siri”, vuri në dukje gazeta iraniane.
Sipas gazetës iraniane, Irani rezervon të drejtën, të sulmojë bazën e tyre, për shkak të akteve terroriste të MKO.
Grupi terrorist MKO u detyrua të largohej nga Iraku në vitin 2016 pasi u përball me kundërshtimin e qeverisë dhe popullit irakian dhe u vendos në Shqipëri siç ishte planifikuar nga SHBA./Opinion.al
