Deputeti i Partisë Socialiste, Pandeli Majko, gjatë seancës dëgjimore në Komisionin e Ligjeve këtë të premte ku po diskutohet për Raportin Vjetor të veprimtarisë së Prokuroria e Posaçme kundër Korrupsionit dhe Krimit të Organizuar gjatë vitit 2021, i ka drejtuar disa pyetje kreut të SPAK, Arben Kraja.
Ndër të tjera, Majko është ndalur tek shpallja non-grata e zyrtarëve të lartë, duke e pyetur kreun e SPAK sesi është çmuar kjo nga ana e Prokurorisë së Posaçme.
“Si e ka çmuar SPAK nga kompetencat ligjore, vendimet për shpalljen non-grata ndaj një zyrtari të lartë në kuadër të nenit 24/6 të kodit të procedurës penale. E vlerësoni këtë si një indicie apo shkak për proaktivitet?”, ka pyetur Majko.
Kraja është përgjigjur duke thënë se është e ndaluar me ligj të japë opinion për institucione të tjera.
“Kjo është pyetje që s’mund të jap përgjigje, e kemi të ndaluar me ligj të japim opinion për institucione të tjera, të brendshme apo të jashtme”, u shpreh ai.
