Një gjykatë në Turqi dënoi me burg përjetë një aktivist dhe filantropist, në një çështje të cilën aleatët ndërkombëtar e konsiderojnë të motivuar politikisht.
Osman Kavala deri tani ka kryer 4 vjet pas hekurave pa u dënuar. Ai u shpall fajtor për akuza që e lidhin me protestat kombëtare të vitit 2013 dhe grushtin e dështuar të shtetit në vitin 2016.
Kavala i mohon këto akuza dhe shprehet se qeveria me këtë vendim po vret sistemin gjyqësor. Procesi u ndoq drejpërdrejt dhe nga diplomatë perëndimor.
Aktivisti u akuzua për herë të parë për orkestrimin dhe financimin e protestave antiqeveritare të vitit 2013, por ato ranë. Më vonë, ai e pa veten të futej në listën e organizatorëve të grushtit të shtetit të vitit 2016, ku mijëra njerëz u arrestuan dhe humbën vendet e tyre të punës.
Për këtë çështje ka reaguar dhe Gjykata Europiane për të Drejtat e Njeriut e cila shprehet se nuk ka prova të mjaftueshme që provojnë fajësinë e Kavalas.
