Kjo është fotoja e biznesmenit Italian Davide Pecorelli i gjetur në një ishull në Itali 8 muaj pasi inskenoi djegien e tij në makinë në Pukë. Mësohet se ai kishte ndryshuar edhe pamjen e jashtme, në mënyrë që të mos identifikohej në Itali.
Mediat italiane publikuan detaje se si autoritetet italiane zbuluan se 45-vjeçari ishte gjallë dhe ndodhej pranë ishullit të Montekristos në Toskanës.
Gjithçka nisi pothuajse një javë më parë kur në një bankomat në Romë u krye një tërheqje parash me kartën e tij. Sinjalizimi për tërheqjen e të hollave i shkoi bashkëshortes së tij shqiptare e cila me anë të një avokati vuri në dijeni autoritetet italiane. Hetuesit nisën verifikimet, por pa mundur të gjejnë se kush i kishte tërhequr paratë, por nisën të krijonin dyshime se biznesmeni ishte gjallë dhe ishte kthyer në Itali.
Me dokumente të falsifikuara ai regjistrua në një hotel në ishullin e Giglio të mërkurën në mbrëmje ku kishte siguruar edhe një gomone me qera. Me vete kishte edhe patentën e tij të vërtetë.
Të premten ai tentoi të zbarkonte në ishullin e Montekristo, por gomonia e tij pësoi avari në mes të detit ku është detyruar të njoftonte ekipet e shpëtimit. Atyre iu prezantua me emrin e vërtetë.
Kujtojmë se automjeti që Pecorelli kishte marrë me qira u gjet i djegur në Pukë në janar të këtij viti. Brenda makinës së djegur u gjetën disa eshtra, ADN-ja e të cilave nuk mundi të identifikohej si dhe celulari dhe ora e tij e shtrenjtë. Historia është ende e rrethuar nga disa pikëpyetje.
Ngjarja u dyshua si kriminale dhe hetimet u përqendruan te një vrasje e mundshme, ndonëse nuk rezultonte se Pecorelli të kishte patur konflikte me njeri. Ai kishte biznese në Shqipëri ku tregtonte pajisje për sallone bukurie. Pecorelli ishte martuar me shqiptare, me të cilën kishte edhe një fëmijë.
Me gjetjen e tij gjallë, janë pushuar hetimet për vrasje, ndërsa tashmë do të hetohen shkaqet e inskenimit të kësaj ngjarjeje.
