Ditën e nesërme Partia Socialiste do të mbledhë Asamblenë Kombëtare. Mbledhja e Asamblesë do të nisë në orën 17:30 dhe do të zhvillohet online, për shkak të situatës së krijuar nga pandemia Covid-19 dhe moslejimi i grumbullimeve me më shumë se 50 persona.
Axhenda e mbledhjes së asamblesë përfshin caktimin e datës së Kongresit të Jashtëzakonshëm të Partisë, ndërsa më tej do të miratojë disa vendime që kanë të bëjnë me organizimin e brendshëm të selisë rozë.
Mbledhja do të vijojë me informacionet mbi gjendjen dhe veprimtarinë e strukturave organizative vendore të partisë si dhe do të nisë analiza për rezultatin e zgjedhjeve parlamentare të 25 prillit. Gjithashtu në mbledhje do të miratohet vendimi për zgjedhjet e reja në strukturat vendore të PS.
10 ditë më pas, në datë 12 qershor socialistët do të mbajnë Kongresin e partisë, në përvjetorin e 30 të Partisë Socialiste.
Ndërkohë, kujtojmë se pak ditë më parë kryeministri Edi Rama në një dalje për mediat tha se shumë shpejt do të ketë një analizë të të gjithë strukturave të Partisë Socialiste dhe u bëri të qartë të gjithë atyre që nuk arritën objektivat të lirojnë vendin. Po ashtu kreu i qeverisë njoftoi se do të ketë dhe një proces të hapjes së PS./Opinion.al
