Kryeministri Edi Rama në një takim të zhvilluar në Dropull në kuadër të zgjedhjeve të 25 prillit ka folur sërish për pezullimin e punës në aeroportin e Rinasit.
Gjatë fjalës së tij kryeministri Rama tha se gjithë mbrëmjes së kaluar është bërë luftë vetëm që ngarkesa e vaksinave të mos humbiste dhe të mos shkonte në një vend tjetër.
Rama sërish akuzoi Presidentin Ilir Meta dhe ish-kryeministrin Sali Berisha që qëndrojnë pas pezullimit të punës në aeroport.
“Jo më larg se dje u bllokua aeroporti i vendit ardhja e vaksinave dhe e gjithë nata pa gjumë për të mbajtur sasinë e vaksinave. Luftë për të mbajtur sasinë e vaksinave që të vinte në Shqipëri për të mos shkuar në një shtet tjetër. Nuk është një pazar ku ti shkon dhe i thua ma mbaj mallin se unë do bëj një xhiro dhe do të kthehem nesër. Luftë për të mbajtur vaksinat që të mos humbisim. Tani do duhet të presim një javë apo 10 ditë për sasinë e vaksinave. Përse? Sepse Ilir Meta dhe Sali Berisha janë pas derës për tu rifutur në shtëpinë e secilit dhe për të bërë rrumpallë nga e para. Për tu futur në shtëpinë e secilit janë gati për të bërë atë që bënë. Për të kthyer kaosin duke marrë peng aeroportin, duke ndaluar mijëra shqiptarë që donin të niseshin dje dhe duke ndaluar të vdekurit që donin të vinin këtu. A e kuptoni se çfarë janë në gjendje të bëjnë këta , një plan i menduar me ditë duke menduar se ne do të kapeshim gafil”, tha Rama./Opinion.al
