Mjeku epidemiolog, Ilir Alimehmeti, përmes një postimi në rrjetet sociale ka thënë se vitaminat janë aleati kryesor për pacientët e infektuar me COVID-19.
Sipas tij, nga studimet e kryera deri më tani ka të dhëna që tregojnë se vdekshmëria në mesin e të infektuarve me COVID-19 ulet me 73.6% nga përdorimi i suplementit me vitaminë D.
Mjeku Alimehmeti, gjithashtu thekson se që në fillim “ishte e logjikshme që vitaminoterapia kishte të gjitha gjasat të ishte e efektshme kundër COVID-19, dhe në mënyrë të veçantë vitamina D. Por, duke qenë se mungonin të dhënat e efektshmërisë së saj mbeteshim në këshilla proverbiale, pasi bota u fokusua, si gjithmonë, vetëm në medikamente duke e lënë në plan të dytë jetën e shëndetshme”.
Në përfundim të postimit të tij, mjeku iu bën thirrje qytetarëve që të bëjnë kujdes dhe të mos infektohen, por në rast infektimi ai këshillon përdorimin e vitamiave.
Postimi i plotë
“Po të marrësh qoftë edhe dietën më të shëndetshme në botë dhe t’i shtosh vitamina, personat që e konsumojnë bëhen dy herë më të shëndetshëm.”
Cit.: Dr. Robert Atkins
Lajme të mira në fushën e terapisë me vitamina kundër COVID-19 miqtë e mi!
Që në fillim ishte e logjikshme që vitaminoterapia kishte të gjitha gjasat të ishte e efektshme kundër COVID-19, dhe në mënyrë të veçantë vitamina D.
Por, duke qenë se mungonin të dhënat e efektshmërisë së saj mbeteshim në këshilla proverbiale, pasi bota u fokusua, si gjithmonë, vetëm në medikamente duke e lënë në plan të dytë jetën e shëndetshme.
Kjo ndodhi edhe pasi u pa qartë që personat e prekur më rëndë dhe sëmundjet e tyre kanë kryesisht të përbashkët stilin e jetës jo të shëndetshme, duke përfshirë, por pa u kufizuar në:
ushqyerjen e gabuar ose të tepruar,
mungesën e aktivitetit fizik,
mungesën e qëndrimit në ambiente të hapura,
mungesën e regjimit të duhur të gjumit, etj.
Fatmirësisht me ecurinë e studimeve tashmë kemi të dhëna nga eksperimentale dhe vëzhgimore të përdorimit të vitaminës D në pacientët me COVID-19.
Studimet e kryera deri më tani u përmblodhën në një meta-analizë (maja e evidencës mjekësore) dhe u publikuan vetëm dy ditë më parë.
Gjetja kryesore:
73.6% ULET GJASA E VDEKSHMËRISË NGA SUPLEMENTI ME VITAMINË D TE PACIENTËT ME COVID-19!
Kujdes, studimet janë ende të pakta dhe, siç deklarojnë edhe autorët, nevojiten studime të tjera për të kuptuar llojin, dozën dhe kohëzgjatjen ideale të vitaminës D shtesë.
Ndërkohë ruani veten dhe mos u infektoni!
Por, nëse infektoheni, vitaminat janë aleatët tuaj kryesorë.
Dr. Shk. Ilir Alimehmeti
Epidemiolog Klinik
Fakulteti i Mjekësisë, UMT/Opinion.al
