Lulzim Berisha dhe kunati i tij Plarent Dervishaj janë shpallur në kërkim ndërkombëtar pas akuzave nga SPAK si të dyshuar për vrasjet e Klodjan Saliut dhe Vajdin Lamajt të ndodhura 15 vite më parë.
Gjykata e Posaçme Kundër Korrupsionit dhe Krimit të Organizuar ka caktuar masat e sigurisë “arrest me burg”, ndaj Lulzim Berishën dhe Plarent Dervishaj.
Ndërkohë të akuzuar janë dhe Indrit Taullai, L.Reci, Viktor Ymeri apo dhe Emiljano Shullazi.
”Për shtetasit L. Berisha dhe P. Dervishaj është bërë shpallja në kërkim ndërkombëtar dhe po punohet ngushtësisht me autoritetet e huaja për lokalizimin dhe kapjen e tyre”– njofton SPAK.
Lulzim Berisha njihet si kreu i “Bandës së Durrësit”, një organizatë kriminale përgjegjëse për disa krime të rënda. Banda nisi të veprojë në Durrës prej vitit 1998, kur Lulzim Berisha, në bashkëpunim me Plaurent Dervishaj, Adriatik Colin, Klodian Saliun dhe Ilir Xhungën vranë me armë zjarri Dritan Sallakun.
Banda e Durrësit akuzohej për një sërë krimesh:
– Vrasja e Dritan Sallakut, 17. 10. 1998 në Durrës;
– Vrasja e Viron Currit e Arjan Pajës;
– Plagosja Marsel Sotirit, 29.10. 998 në fshatin Rrashbull të Durrësit;
– Vrasja e Marsel Sotirit, 22. 08.1999 në plazh, Durrës;
– Vrasja e Dritan Dishës, 09.07.2000 në Shënavlash, Durrës;
– Vrasja e Ervin Lames, 14. 01. 2002 në lagjen numër 3, Durrës.
Lulzim Berisha kreu disa vite burg për akuzat e grupit të strukturuar kriminal ndërsa në dhjetor të vitit 2016 ai është liruar me kusht nga drejtësia shqiptare.
