Ministrja e Shëndetësisë, Ogerta Manastirliu e ka konsideruar “politikë me virusin”, planin me 5 pika të Partisë Demokratike për rimëkëmbjen nga kriza e pandemisë.
Manastirliu foli me maskë nga foltorja e Kuvendit dhe falenderoi qytetarët që sipas saj kanë respektuar sot vendimin për mbajtjen e maskës kudo.
Në fjalën e saj ajo theksoi se është e rëndësishme të jemi të solidarizuar në këtë situatë dhe tha ajo nuk duhet shfrytëzuar për të bërë politikë.
“Nuk është situatë e lehtë situata e pandemisë Covid 19. Falenderoj përzemërsisht sot të gjithë qytetarët që kanë respektuar vendimin për të vendosur maskat kudo jashtë shtëpis. Është një hap drejt asaj që ne duam të gjithë së bashku, për të reduktuar sa më shumë kufizimin e virusit.
Maskat, distanca sociale, higjiena, janë tre rregulla të gjithëpranuara tashmë për mbrojtjen tonë, për të fituar betejën shëndetësore e cila nuk do të jetë e lehtë. Sot edhe në këtë parlament dëgjova që bëhej politika e ditës me sëmundjen e virusit, duke thënë e përshkruar shumë gjatë apo shkurt se pse maskat duheshin tani apo pastaj. Konteksti është shumë i qartë, mund edhe të përdorë këtë situatë për të bërë politikë, edhe ata që janë jashtë parlamentit vijojnë të flasin për plane të llogarituara keq me lapsa, me lapsuse apo dhe me pika dhe pa pika.
Është situatë serioze, duhet ta trajtojmë të tillë, duhet të jemi të gjithë bashkë kundër një virusi të rrezikshëm që kërcënon jetën e shqiptarëve. Kjo situatë kërkon solidaritet, le të jemi të gjithë bashkë, ta shohim me racionalitet, të mos mbingarkojmë sistemin shëndetësor duke vendosur rregullat që vendosen për të mirën e qytetarëve.
Kjo nuk është një luftë vetëm e qeverisë, por gjithë qytetarëve shqiptarë që duhet të vijojnë zbatimin e këtyre rregullave që të shmangin pasojat e nje mbyllje apo kufizimeve që do të ishin të detyrueshme nëse nuk do ti zbatonim këto rregulla si kemi filluar sot. Shpresoj fort që kjo masë të viijojë në ditët e ardhshme.”, tha ministrja Manastirliu. /Opinion.al
