Domart Konjari i ka dërguar një letër ambasadës franceze në Tiranë, ministrisë së Drejtësisë, KLGJ dhe KPK ku pretendon se vendimi i dhënë për të ditën e djeshme nga GJKKO është në shkelje të të drejtave themelore të njeriut.
Gjykata e Posaçme dënoi dje me 15 vite burg Domart Konjarin. Ai, ndodhet prej katër vitesh në arrati, ndërsa akuzohet për veprat penale:“trafik droge’, “pjesëmarrje në organizatë kriminale”, “pastrim parash”, “falsifikim dokumentesh” dhe “tentativë për të korruptuar policinë”.
Konjari e cilëson vendimin e djeshëm si të padrejtë, ndërsa në letrën e përgatitur nga avokatët e tij, bëhen me dije “shkeljet e pretenduara të Konventës se te Drejtave te Njeriut, shkeljen e Konventave Ndërkombëtare, shkeljen e të drejtave kushtetuese, shkeljen e të drejtave procedurale dhe ligjore të kryera si nga ana e Prokurorisë së Posaçme Kundra Korrupsionit dhe Krimit të Organizuar në ngritjen e akuzës ashtu edhe nga ana e Gjykatës se Posaçme Kundër Korrupsionit dhe Krimit te Organizuar në gjykimin e çështjes penale ne ngarkim të të pandehurit z.Domart Konjari’.
Ai shkruan se GJKKKO dje dha një vendim penal të paprecedent, vendim që sipas tij ka minuar të drejtat themelore të njeriut. Konjari deklaron se konkluzionet e avokatëve nuk u lexuan në seancën e dhënies së vendimi dhe se Gjykata dje ka dhënë një vendim pa praninë e tyre.
Po ashtu në letrën e tij, Konjari kërkoi nga mediat të cilat kanë pasqyruar më datë 14.09.2020 lajmin e dhënies të këtij vendimi të përgënjeshtrojnë lajmet e tyre rreth akuzave, të cilat i quan të rreme.
Konjari u arrestua në nëntor të vitit 2015, për llogari të autoriteteve franceze.
Mirëpo, pesë muaj më vonë, Apeli i Krimeve të Rënda zbuti masën e sigurimit ndaj Konjarit, nga “arrest me burg” në “detyrim paraqitjeje”. Asokohe reagoi ashpër ndaj drejtësisë shqiptare ambasada franceze, në Tiranë, pasi ky shtetas kishte llogari te hapura edhe me drejtësinë në Francë.
Kjo e detyroi ministrin e drejtësisë së kohës Ylli Manjani që të kërkonte ndjesë për vendimin e gjykatës së Apelit. Prokuroria i bëri rekurs vendimit të apelit, por Gjykata e Lartë e rrëzoi duke i dhënë të drejtë shkallës së dytë të Krimeve të Rënda.
Kjo bëri që Konjari të arratisej dhe të jetë ende në kërkim. Në dosjen që gjykata ka marrë nga autoritetet franceze, renditen me detaje të gjitha veprimtaritë e Konjarit në Shqipëri, Francë, Holandë, Belgjikë, Spanjë, Itali dhe Gjermani.
Konjari dyshohet se drejtonte rrjetin e trafikut të kokainës, pasi mendohet se ka lidhje direkte me burimin e prodhimit të saj në Amerikën e Jugut. Si pasojë e këtij rrjeti, influencës në treg dhe shpërndarjes së drogës në Europë, hetuesit francezë thonë se kanë ndodhur edhe disa vrasje, ku në dy raste, 42-vjeçari Konjari u ka shpëtuar atentateve me armë.
Në dosje, emri i Konjarit përmendet si i përfshirë direkt ose indirekt në disa vrasje për trafikun e drogës. Aty përmendet vrasja e 29 gushtit të vitit 1998, kur është ekzekutuar Gentian Dervishi, i njohur ndryshe me nofkën “Gent Kadaifi”.
Vrasja ndodhi pranë “Shkollës së Kuqe”, në Tiranë. Më pas, emri i Konjarit del në vrasjen e ndodhur në vitin 2003, në qytetin Rene të Francës, ku u vra Erion Murati për një mosmarrëveshje për trafikun e drogës. Lista e atentateve ku dyshohet se ishte përfshirë Konjari, vijon me ngjarjen e 3 gushtit të vitit 2005 në Tiranë, ku u ekzekutua Fatjon Naxhaku./ Opinion.al
