“Mali i Zi nuk do të bëhet kurrë Sparta Serbe, as krahinë e Shqipërisë së Madhe. Ne nuk duam ngjarje nga Maqedonia e 2015 në Mal të Zi”.
Kështu deklaroi sot në një konferencë për shtyp, Dritan Abazoviç, shqiptari i cili drejton listën “Bardh e Zi” dhe mori katër deputetë në parlamentin malazez.
Ai dënoi me forcë ngjarjet, kërcënimet, dhunën e mbrëmshme, pavarësisht nga anëtarët e cilit komb iu drejtuan, raportojnë mediat vendase.
“Ne mundëm mafien në zgjedhje, por askush nuk do ta mposhtë kurrë shtetin tonë të përbashkët të Malit të Zi. Ne i ftojmë të gjithë të qëndrojnë në shtëpi dhe të festojnë në shtëpitë e tyre. Ne u japim një dorë të gjithëve, partive të pakicave, të gjithë popujve që jetojnë në Malin e Zi. Mali i Zi mund të zhvillohet ekskluzivisht si një shtet civil dhe si një vend që përpiqet të anëtarësohet në Bashkimin Evropian. Mos lejoni që sjellja juaj ose elementet e futura të rrezikojnë fitoren e të gjithë qytetarëve të Malit të Zi ”, tha Abazoviç.
Ai shtoi se koalicioni i ri qeverisës, nuk do të rrezikojë asnjë interes kombëtar të Malit të Zi.
“Ju mund të ndjeheni plotësisht të sigurt në Malin e Zi. Ne nuk duam ngjarjet nga Maqedonia në 2015 në Mal të Zi. Njerëzit që votuan për DPS mund të jenë humbës politikë, por si qytetarë ata janë fitues. Le të ruajmë paqen dhe të veprojmë si një shoqëri dhe shtet serioz. Unë jap fjalën time se koalicioni Bardh e Zi nuk do t’i nënshtrohet asnjë presioni dhe se ai do të udhëhiqet vetëm nga interesat kombëtare të Malit të Zi dhe interesi më i madh është të përfundojmë tranzicionin dhe të formojmë një qeveri eksperte,” deklaroi Abazoviç.
Duke komentuar lajmin për një mbledhje të qytetarëve pro-malazezë të dielën në Podgoricë, Abazoviç tha se ata që mendojnë se qeveria në Malin e Zi do të ndryshojë me trëndafila dhe duartrokitje gabojnë.
Ai tha se fundi i tranzicionit është i dobishëm për Malin e Zi. /Opinion.al
