Presidenti sirian Bashar al-Asad ndërpreu një fjalim para parlamentit pasi filloi të ndjehej i dobët – duke u thënë ligjvënësve se duhej të “ulej për një minutë”.
Momenti ndodhi kur udhëheqësi i 54-vjeçar i partisë Bathe kishte folur rreth tridhjetë minuta në fjalimet e tij të mërkurën.
Asad nisi të ndihej i dobët dhe ndaloi fjalimin e tij, në dy raste për të pirë ujë.
Pak më vonë, presidenti sirian – i cili është edhe mjek – tha: “Më ka rënë tensioni dhe unë kam nevojë të pi ujë”.
“Më duhet të ulem për një minutë nëse nuk ju vjen keq, vetëm një minutë,” shtoi ai disa momente më vonë.
Asad më pas u largua nga salla ku po mbante fjalën e tij dhe u kthye më vonë nën duartrokitjet e anëtarëve të parlamentit.
Pasi u kthye në podium, Asad tha me shaka se “mjekët janë pacientët më të këqij”.
Ai vazhdoi të shpjegojë se nuk kishte ngrënë që nga e marta pasdite.
“Unë nuk kam as sheqer as kripë në gjak dhe ndodh kjo” shtoi ai.
Një zëdhënës për zyrën e Asadit tha të mërkurën se fjalimi u ndërpre për “disa minuta” si rezultat i një rënieje të lehtë të tensionit të gjakut. Ata shtuan se ai vazhdoi fjalimin pa probleme pas incidentit.
Asad nuk dihet të vuajë nga ndonjë sëmundje e rëndë.
Ai mbajti fjalimin e tij teksa anëtarët e parlamentit mbanin maska dhe mbajtën distancën sociale, duke qëndruar ulur një metër larg njëri-tjetrit në një hapësirë të krijuar në një sallë kongresesh./ Opinion.al
