Kryeministri Rama përsëriti disa herë sot nga kryesia e Kuvendit se koalicionet zgjedhore nuk do të hiqen. Ndryshimet kushtetuese ai tha se do të rimodelojnë formulën e koalicioneve duke qenë se do të hapen listat.
Nëse formula nuk do të rimodelohet ai tha se rrezikojmë që në Tiranë të kemi 3 mijë kandidatë.
Rama shtoi se edhe ai do të habitej nëse do të ishte në Bruksel dhe do i thonin se në Shqipëri po ndalohen koalicionet por ky nuk është rasti tha ai.
“Edhe unë po të isha në Bruksel dhe po të më thoshin që në Shqipëri do të bëjnë një reformë zgjedhore që do të ndalojnë koalicionet do të thoja ça është kjo? Jemi në mjegull dhe duhet të presim që gjithçka të shkruhet dhe të mos ecim pas llafeve. Ku është shkelja e barazisë dhe rrugës europiane këtu? Është e vërtetë që për këtë çështje s’ka pas dakordësi në Këshillin Politik po nuk është arsye për të mos e trajtuar nëse ka dakordësi në Parlament.”, tha Rama.
Kryeministri tha Partia Socialiste nuk do dalë nga procesi pa miratuar marrëveshjen e 5 qershorit.
“Do të punojmë me opozitën parlamentare për votën e tyre po nuk do të dalim nga procesi pa miratuar fjalë për fjalë atë që kemi rënë dakord në 5 qershor. E kuptoj Murrizin, është viktimë e vjedhjes së votave nga partia e tij . Megjithatë ne duam që procesi të ecë shpejt. E mirëkuptoj frustrimin e tyre, marrëveshja është marrëveshje, Le të marrin shembull nga ne. Jemi më të mëdhenjtë dhe kemi lëshuar më shumë se të tjerët. Por ne jemi partia që udhëheq, nuk jemi as shtesë gati, as godinë pa leje.”. /Opinion.al
