Shqipëria vijon të shfaqë shifra të larta të infektimeve ditore nga COVID -19. Ajo që duket shqetësuese lidhet me përqindjen e lartë të infektimve në raport me testimet e kryera, veçanërisht gjatë javës së fundit.
Javën e shkuar rreth 18% e personave që janë testuar kanë rezultuar pozitivë me Covid-19.
Ministrja e Shëndetësisë Ogerta Manastirliu ka ritheksuar sot se strategjia e ndjekur në Shqipëri ka rezultuar shumë efikase.
“Është shumë e rëndësishme në këtë fazë bashkëpunimi i qytetarëve. Është një strategji që ka rezultuar shumë efikase deri tani, por është një strategji që kërkon bashkëpunimin e të gjithëve”, u shpreh Manastirliu.
Gjatë një vizite në laboratorin e Institutit të Shëndetit Publik ajo tha se ka më shumë se 90 mijë teste për identifikimin e rasteve të reja me Covid-19 në Shqipëri dhe shtoi që së shpejti do të instalohet një aparaturë e re testimi, për fuqizimin e kapaciteteve laboratorike në vend.
“Më shumë se 90 mijë teste janë të disponueshme në Institutin e Shëndetit Publik dhe do të vijojë fuqizimi i kapaciteteve laboratorike, qoftë nëpërmjet numrit të testeve, kiteve të laboratorit, gjithashtu dhe fuqizimit me aparatura të reja për ta fuqizuar këtë laborator për të përballuar atë që mund të vijë nesër. Çfarë është e rendësishme është që ne kemi një plan, kemi një strategji për forcimin e laboratorit të ISHP-së, por edhe për fuqizimin e laboratorit të QSUT-së. Gjithashtu kemi dhe një plan më afatgjatë në raport me testimin edhe në raport me gjurminin dhe hetimin epidemiologjik”, tha Manastirliu.
Nisur nga kjo deklaratë, nuk dimë nëse Shqipëria po përgatitet të rrisë numrin e testimeve, në një kohë kur shifrat e të infektuarve ditorë janë më të larta nga sa kanë qenë në muajin mars apo prill. Ndërkohë, në mënyrë të vazhdueshme opozita ka kritikuar qeverinë se stratetegjia e saj dhe testimet e ulëta kanë qenë një zgjedhje e gabuar.
Në vendin tonë janë kryer gjithësej 29,669 testime për të dyshuarit me Covid-19.
Por situata problematike sa i përket koronavirusit është raportuar edhe në rajon, e megjithatë, Kosova dhe Maqedonia e Veriut testojnë më shumë në raport me popullsinë.
Në Kosovë, numri i përgjithshëm i testimeve të kryera është rreth 26 mijë dhe vendi ka pothuajse gjysmën e popullsisë së Shqipërisë. Ditën e djeshme kryeministri Hoti deklaroi se do të blinin edhe 100 mijë kite testimesh shtesë.
E njejta situatë paraqitet edhe në Maqedoninë e Veriut, e cila megjithëse raporton situatë më të rënduar, ka testuar deri tani rreth 70 mijë të dyshuar për Covid-19. /Opinion.al
