Kina ka lançuar të martën satelitin e saj të fundit në fushën e navigimit “Beidou”, duke krijuar kështu një rival të ri për GPS dhe duke hyrë tashmë në një grup elitar të vendeve që kanë sistemin e tyre satelitor të navigimit.
Sateliti kinez Beidou i sapodërguar në orbitë do të jetë zemra e një sistemi global të ndërlidhjes të kontrolluar nga Pekini. Sistemi satelitor i sapolëshuar në hapësirë nga Kina është gjenerata e tretë e pajisjeve që i përkasin klasës Beidou (Osa Madhore, në gjuhën Mandarine) dhe është modeli i 55-të i këtij të fundit, të ndërtuar deri më tani. Nisja u bë rreth orës dhjetë të mëngjesit të së martës, nga baza e Xichang, e vendosur në malet e jug-perëndimit të ish-Perandorisë Qiellore.
Sateliti i ri Beidou u dërgua në hapësirë falë shtytjes së një rakete Long March-3. Përpjekjet e mëparshme për të dërguar satelitin e Pekinit mes yjeve kishin shkuar dëm, shkruante gazeta Overseas, për shkak të problemeve teknike të paspecifikuara. Beidou do të garantojë mbulim botëror për matjen e kohës, për sinkronizimin e orëve dhe për navigimin. Ai do të jetë në gjendje të rivalizojë me sisteme satelitore ekzistuese, si amerikani Gps apo rusi Glonass dhe evropiani Galileo. Sipas ekspertëve kjo shtysë e Kinës për një sistem satelitor ishte e nxitur edhe nga dëshira për të reduktuar varësinë nga GPS i SHBA veçanërisht në përdorimin për forcat e armatosura./Opinion.al
