Në përfundim të mbledhjes së kryesisë së Partisë Demokratike, kreu i saj Lulzim Basha tha se opozita e bashkuar do të fokusohet te ringritja ekonomike.
Basha paralajmëroi prezantimin e një platforme ekonomike në të gjithë Shqipërinë dhe u shprej i bindur se opozita do të fitojë zgjedhjet.
“Sfida më e madhe e çdo familje, sfida e madhe e çdo shqiptari sot është kriza ekonomike. Dhe kjo sfidë nuk mund të zgjidhet nga ata që e shkaktuan këtë krizë të thellë ekonomike duke e varfëruar, zhvatur dhe taksuar Shqipërinë në këto 7 vite. Ndaj e gjithë vëmendja jonë, i gjithë fokusi ynë, i gjithë përqendrimi ynë tani është tek e ardhmja. Është te një ekonomi e fortë dhe një Shqipëri e fortë.
Ndaj, Partia Demokratike dhe Opozita e Bashkuar janë të vendosur të paraqesin platformën ekonomike, ta konsultojmë atë kudo nëpër Shqipëri. Ne do t’i fitojmë zgjedhjet së bashku me shqiptarët, do t’i kthejmë qeverisjen vendit dhe do të kemi në fokusin tonë ringritjen ekonomike dhe ndërtimin e një ekonomie të fortë për shqiptarët që të prodhojë mirëqenie dhe vende pune.
Ky do të jetë përqendrimi i të gjithë energjive tona, ne nuk do të humbasim asnjë sekondë me gropat dhe kurthet e një qeverie të dështuar në largim, por do të përqendrojmë të gjithë energjinë tonë, të Partisë Demokratike, të aleatëve tanë, të Opozitës së Bashkuar, tek fitorja e zgjedhjeve të ardhshme dhe zgjidhja e krizës së rëndë ekonomike duke ofruar planin tonë, masat tona shqiptarëve dhe duke ndërtuar bashkë me shqiptarët rrugën e daljes nga kjo krizë, për t’ua kthyer ekonominë dhe Shqipërinë, shqiptarëve.”, tha Basha.
Gjatë mbledhjes së ditës së sotme, kreu i PD i propozoi kryesisë zbatimin e parimit një anëtar një votë brenda kryesisë për zgjedhjen e të gjithë kandidatëve për deputetë dhe kryetar bashkie.
Në këtë mënyrë Basha ka vendosur të mos jetë ai që vulos përbërjen e listave të kandidatëve por ia ka lënë këtë vendim kryesisë. Mësohet gjithashtu se përzgjedhja do të bëhet në periudhën nga 20 qershori deri në 15 shtator./ Opinion.al
