OFL deklaroi se përgjatë dy muajve të fundit, nuk e ka ndërprerë punën asnjë ditë, por ka vijuar hetimet dhe goditjen e subjekteve të Ligjit Special.
Kështu, mbrëmjen e djeshme OFL sekuestroi 1,2 milion litra naftë dhe një magazinë doganore, në Durrës, në pronësi të subjektit privat të Lulzim Berishës dhe Enver Shoshit.
OFL sqaroi se këtij subjekti, më datë 13 shkurt të vitit 2019, i ishte revokuar licenca nga autoritetet kompetente shtetërore. Por pavarësisht kësaj, subjekti ka vazhduar të ushtrojë në mënyrë të paligjshme aktivitetin e tregtimit të naftës për peshkimin, duke përdorur shantazhin ndaj konkurrencës dhe duke tentuar të krijojë një monopol kërcënues për operatorët e industrisë së peshkimit.
Pasi e ka ndjekur fillin e këtij organizimi kriminal, OFL ka kryer mbrëmë operacionin e sekuestros dhe po vijon, në bashkëpunim me Strukturat e Specializuara të Hetimit Financiar, hetimin intensiv për zbulimin dhe dokumentimin e gjithë veprimtarisë kriminale në këtë fushë dhe lidhjen me persona të tjerë publikë e privatë./Opinion.al
