Ndonëse kriza e koronavirusit i myblli në shtëpi shqiptarët, disa prej tyre nuk e kishin një të tillë si pasojë e tërmetit të 26 Nëntorit i cili dëmtoi mijëra banesa dhe u mori jetën 51 personave.
Tashmë kanë kaluar më shumë se 5 muaj nga tragjedia dhe në Thumanë ende nuk ka përfunduar prishja e objekteve ndërsa për Krujën pritet të ndodhë javën e ardhshme. Këto u bën të ditura në një mbledhje online të kryeministrit Rama me ministrin e Rindërtimit, Arben Ahmetaj, ministren e Kulturës Elva Margariti, drejtorin e Fondit të Zhvillimit Kombëtar Dritan Agolli dhe kryebashkiakun e Krujës Artur Bushi.
Ky i fundit tha se ka ende pak objekte për tu prishur në Thumanë dhe i njejti proces është gati të nisë në Fushë-Krujë dhe Krujë. Sipas drejtorit të FZHK, plani për ndërtimin është i hapur dhe prishja mund të nisë që nga java e ardhshme por nga ana tjetër ai shtoi se po plotësohen ende dosjet për shpronësimin e pronarëve. Pra kantieri do të hapet pa mbaruar ende shpronësimi.
Ministrja Margariti gjatë prezantimit të planit të rindërtimit tha ndër të tjera se hapsira për prishje është rreth 26 mijë metra katrorë dhe përfshin 26 banesa kolektive. Ajo shtoi se janë edhe 8 banesa për tu prishur në disa zona të tjera. Zona do të ketë rigjenerim urban tha ajo por mbetet për tu sqaruar sa kohë do të marrë prishja e kësaj sipërfaqeje të madhe dhe rindërtimi gjithashtu duke qenë se pas 5 muajsh ende nuk ka përfunduar prishja e Thumanës.
Kryeministri Rama nga ana e tij bëri edhe propozimet në lidhje me çështjen e shpronësimeve.
“Ofertën e parë të këtyre që janë në të drejtën e tyre, subjekt i marrjes së një pagesë për pronën. Duhet t’ua bëni për një shkëmbim në natyrë. Ata që do të humbasin në objekt apo hapësirë të caktuar, t’u propozohet që të marrim kompensimin nga ndërtimi, një hapësirë të mirë dhe të favorshme. Edhe për të shmangur shpenzimet e tepërta dhe për ata vet që të kenë mundësi që të fitojnë në pasuri të patundshme dinjitoze. Nëse nuk duan, ne do procedojmë me procedurën ligjore të shpronësimit”, tha Rama./Opinion.al
