Italia është vendi me pasoja më të mëdha të shkaktuar nga koronavirusi. Ndërkohë, shteti fqinj ka hartuar një plan për rikthimin në normalitet.
Ministri i Shëndetësisë, Roberto Speranza, ka zbuluar detaje në lidhje me planin e Italisë për daljen graduale nga pandemia.
Ai tha se; “Beteja kundër koronavirusit nuk është fituar, por objektivi ynë është të gjejmë një mënyrë për të bashkëjetuar me këtë kërcënim, derisa të gjendet një kurë apo vaksinë”.
Në këtë plan përfshihen 5 pika kyçe: distancim social dhe mjete mbrojtëse për të gjithë, spitale Covid në të gjithë territorin kombëtar, përforcim i rrjeteve shëndetësore lokale, studim për të kuptuar sa janë prekur dhe një aplikacion, si modeli i Koresë së Jugut, për të verifikuar kontaktet e personave të infektuar.
“Duhet të themi të vërtetën: situate mbetet dramatike. Emergjenca vijon dhe do të kemi muaj të tjerë të vështirë. Nuk dua të mashtroj askënd, është e kotë të mendosh se ka një zgjidhje shpëtuese. S’mund të jap një datë kur do të mbarojë gjithçka, pasi do të ishte e papërgjegjshme”, tha ministri.
Qeveria italiane thekson se aplikimi i këtyre masave për rikthim në normalitet do të kërkojë kohë. Sipas tij, një nga probleme është krijimi i aplikacionit, pasi duhet të respektojë dhe ligjin për privatësinë./ Opinion.al
