Përplasja mes Presidentit Thaci dhe kryeministrit Kurti për shpalljen e gjendjes së jashtëzakonshme në Kosovë i ka shkaktuar pasojat në qeveri.
Kryeministri Albin Kurti ka shkarkuar sot ministrin e Brendshëm, Agim Veliu.
Shkarkimi i tij është bërë pasi ai ka deklaruar në media se është kundër vendimit të kryeministrit për të mos shpallur gjendjen e jashtëzakonshme dhe ka thënë se të prekurit po shtohen “orë prej ore”.
Kryeministri Kurti e ka konsideruar këtë “mungesë të theksuar lidershipi”dhe se “ka minuar hapur punën e qeverisë, pjesë e të cilës ai është”.
Për këtë arsye ai e ka shkarkuar Veliun pak pasi edhe qeveria e Kosovës kishte marrë mandatin qeverisës.
Ndërkohë po sot Presidenti Thaci ka firmosur dekretin për shpalljen e gjendjes së jashtëzakonshme për 30 ditë. Ai ka deklaruar se shpreson që Kuvendi ta miratojë atë.
Agim Veliu është gjithashtu nënkryetar i LDK-së, partia e koalicionit qeverisës me VV-në. Nuk dihet ende nëse shkarkimi i tij mund të sjellë edhe krisjen përfundimtare mes dy partive në pushtet.
Njoftimi i plotë:
Mbrëmë vonë, pas mesnate, Ministri i Punëve të Brendshme dhe Administratës Publike, z. Agim Veliu, për televizionin Klan Kosova, u deklarua kundër qëndrimit të Kryeministrit të Republikës së Kosovës mbi shpalljen e gjendjes së jashtëzakonshme. Ai, gjithashtu, në këtë deklarim, përhapë panik duke thënë se “numri i të prekurve po rritet prej ore në orë”. As Ministria e Shëndetësisë e as Instituti Kombëtar i Shëndetësisë Publike nuk thanë që numri i të infektuarve me COVID-19 po rritet nga ora në orë. Në këto momente, kur e gjithë administrata publike po bën përpjekje maksimale për të minimizuar dëmet nga virusi Korona, udhëheqësit e institucioneve qendrore, përfshirë këtu anëtarët e kabinetit qeveritar duhet të demonstrojnë maturi si në vendime ashtu edhe deklarime.
Përmes deklaratave të tij të bëra publikisht, por jo edhe të mbështetura me qëndrime të tij në mbledhje të brendshme, Ministri i Punëve të Brendshme dhe Administratës Publike, z. Veliu ka dëshmuar mungesë të theksuar lidershipi dhe ka minuar hapur punën e qeverisë, pjesë e të cilës ai është. /Opinion.al
