Delegacioni i Komisionit të Venecias ndodhet në Shqipëri me një mision fakt-mbledhës në kuadër të dhënies së opinionit për dy projektligje, atë për Autoritetin e Mediave Audio Vizuale, (AMA) dhe tjetri për Autoritetin e Komunikimeve Elektronike dhe Postare, (AKEP), ose siç është pagëzuar ndryshe, paketa e ligjeve “Antishpifje”.
Delegacioni ka zhvilluar sot një takim me përfaqësuesit e opozitës. Në takim morën pjesë ish-deputetja Albana Vokshi, ish-ministri Genc Pollo dhe ish-deputeti Edmond Haxhinasto.
Në përfundim të takimit, Vokshi tha se qeveria duhet të marrë për bazë opinionin e Komisionit të Venecias kur ai të dalë dhe ritheksoi qëndrimin e opozitës lidhur me dy projektligjet.
“Qëndrimi i PD dhe opozitës është që këto dy ligje duhet të anulohen, nuk duhet të përmirësohen dhe duhet të grisen sepse janë anti-kushtetuese, anti-demokratike dhe anti-europiane.
Ne besojmë që opinioni i Komisionit të Venecias do të jetë objektiv ndaj dhe i bëjmë thirrje qeverisë dhe kryeministri të të zbatojë opinionin e këtij komisioni kur ta nxjerrë për paketën anti-shpifje”, tha Vokshi.
Ardhja e delegacionit të Venecias në Tiranë bëhet në një kohë kur këtij autoriteti i janë drejtuar me kërkesë për opinion, Komiteti i Monitorimit të Asamblesë parlamentare të Këshillit të Europës dhe Përfaqësuesi i OSBE-së për liri të mediave, Harlem Désir.
Dhjetëra gazetarë, përfaqësues të organizatave të medias dhe të shoqërisë civile protestuan kundër së ashtuquajturës “paketë antishpifje”, duke deklaruar se qeveria po ngre institucione censure dhe po mundohet të godasë fjalën e lirë. Por socialistët pohuan se po mundohen të rregullojnë tregun e mediave online dhe të shmangin lajmet e rreme.
Organizatat shqiptare të shtypit thonë se po kërkojnë standarte europiane dhe ndërkombëtare të lirisë së shprehjes, të cilat qeveria po i shkel me ligjet e sotme duke sjellë censurë dhe autocensurë, ndaj zgjidhja e këtij konflikti të shtypit me qeverinë është rrëzimi i ligjeve të ashtuquajtura për anti-shpifjen dhe vetërregullimi i komunitetit të medias./ Opinion.al
