Procesi gjyqësor në Apel ndaj Emiliano Shullazit dhe tre të pandehurve të tjerë të grupit të tij ka mbetur në vend numëro prej më shumë se një viti tashmë.
Procesi është shtyrë vazhdimisht duke bërë që procesi mos të zhvillojë dot as seancën e tij të parë. Natyrisht që çështja është mjaftë delikate pasi ka të bëjë me një nga personat më të përfolur të botës së krimit i cili është dënuar me 14 vite burg nga Gjykata e Shkallës së Parë të Krimeve të Rënda. Pjesë e kësaj kohëzgjatjeje maratonë të këtij procesi janë edhe presionet ndaj magjistratëve dhe një gjë e tillë dëshmohet edhe në atë çka ka denoncuar bashkëshorti i gjyqtares Saida Dollani e cila ka qenë pjesë e trupit gjykues në këtë çështje.
“Isha në lokalin e lagjes bashkë me një mikun tim. Një moment dola të pija një cigare të dera e jashtme. Aty pranë kaloi bashkëshortja ime me një shoqen e saj dhe vajzën. Pak minuta më pas, në të djathtën time erdhi një djalë i rri, rreth 20-22 vjeç, i cili ishte veshur me bluzë ngjyrë si në të zezë, pantallona të errëta dhe atlete të bardha. Ai erdhi direkt me pistoletë në dorë dhe vuri këmbën e majtë pas këmbës sime të djathtë. Më rrëzoi në tokë dhe më drejtoi pistoletën në gojë. Mu drejtua me fjalët ‘ti me atë tët shoqe mos harro se ke dy fëmijët në Francë’.
Në këtë moment ndërhyri shoku im, i cili e kapi nga pas personin. Ai u largua nga pjesa e djathtë e rrugës, ku e mori një automjet i bardhë, që drejtohej nga një person me mjekër. Kërcënimi në drejtimin tim ka ndodhur për shkak të funksionit të bashkëshortes time si gjyqtare në gjykatën e Apelit për Krime të rënda”.
Kjo është dëshmia e bashkëshortit të Saida Dollanit, anëtares së gjykatës së Posaçme të Apelit, dhënë prillin e 2019, kur ajo kishte në shqyrtim dosjen ndaj Emiljano Shullazit dhe miqve të tij të dyshuar për gjobëvënie në kuadër të grupit të strukturuar kriminal.
Pas kësaj dëshmie, nisëm menjëherë hetimet për rastin në fjalë por nga ana tjetër të pandehurit akuzonin gjyqtaren se po kalonte vettingun me çështjen e tyre.
Hetimet nuk dhanë rezultat dhe prokurorja Ida Ahmetlli iu drejtua gjykatës së Tiranës me kërkesën për pushimin e çështjes. Kërkesa e prokurores Ahmetlli u rrezua nga gjykata e cila vendosi ta rikthejë dosjen në institucionin e akuzës për hetime të mëtejshme. Megjithatë Saida Dollani u largua nga kryesimi i trupës që shqyrton dosjen “Shullazi”.
Çështja tashmë është bërë edhe më e komplikuar pasi janë konsumuar të gjithë anëtarët e Apelit të Posaçëm, veç Albana Boksit, që aktualisht ka në duar çështjen. Janë deleguar dy gjykatës nga apelet e rretheve por në kushtet kur Apeli i Krimeve të Rënda u shkri dhe u krijua gjykata e Posaçme e Apelit, ngërçi qëndron në faktin nëse dy gjyqtarët e deleguar më herët mund të marrin pjesë në shqyrtimin e kësaj dosjeje. Për këtë gjykata i është drejtuar me shkrese Këshillit të Lartë Gjyqësor, por ende nuk ka marrë përgjigje. /Opinion.al
