Kryeministri Rama paralajmëroi se nga dita e sotme nis zbatimi i masave të paketës ‘Anti-KÇK’, por ish-deputeti demokrat Enkelejd Alibeaj tha se kjo është vetëm një propagandë e tij.
Në një konferencë për mediat, ai deklaroi se nëse kryeministri kërkon të godasë pasuritë e personave të inkriminuar atëherë le ta fillojnë nga Edmond Bego.
“Lufta kundër krimit të organizuar dhe pasurive të tij të paligjshme është emergjencë kombëtare, por kjo e Edi Ramës është vetëm propagandë dhe tallje me shqiptarët, në përpjekje për të të mbuluar bashkëqeverisjen e tij me krimin.
Nëse nuk do të ishte kështu, trafikanti ndërkombëtar i drogës Edmond Bego nuk do të kishte marrë nga qeveria e korruptuar e Edi Ramës tendera, leje dhe licenca.
Që kur lidhi miqësi me Taulant Ballën, numrin 2 të Partisë Socialite, Edmond Bego ka marrë 14 milionë euro para publike, në shkelje të ligjit të prokurimit publik, i cili përjashton nga pjesëmarrja në tender personat e dënuar për trafik ndërkombëtar droge.
Le ta nisë zbatimin e ligjit anti KÇK me goditjen e trafikantëve të dënuar të drogës dhe pasurive të tyre të paligjshme, si Edmond Bego i Taulant Ballës, për të cilin, bashkë me Erion Veliajn, ndryshuan rrjedhën e lumit të Lanës, duke i hapur rrugën pastrimit të 60 milionë eurove.”, deklaroi Alibeaj.
Kryeministri Rama deklaroi më herët gjatë konferencën me Presidentin e PE, David Sassoli se zbatimi i masave të ligjit të ri ka filluar që nga dita e sotme dhe se ai nuk do të ndalet në konfiskimin e pasurive të pajustifikuara por dhe në procedimin penal të këtyre personave. /Opinion.al
