Sekretari amerikan i Shtetit, Mike Pompeo, e quajti Partinë Komuniste të Kinës, si kërcënimin më të madh të kësaj epoke.
Duke folur së bashku me ministrin e Jashtëm britanik Dominic Raab, Pompeo tha se ai e konsideronte Partinë Komuniste kineze si “kërcënimin kryesor të kësaj epoke” si dhe u bëri thirrje Shteteve të Bashkuara dhe aleatëve të saj, që të sigurohen se posedojnë fuqinë ushtarake dhe teknologjike, për tu siguruar se ky shekull qeveriset nga parimet perëndimore.
Pompeo ndodhet në Britaninë e Madhe për të diskutuar vendimin e Londrës, që kompania kineze Huawei, të ketë rol të kufizuar në rrjetin 5G. Shtetet e Bashkuara kishin lobuar që Mbretëria e Bashkuar ta përjashtojë Huawein nga planet e rrjetit 5G, për arsye sigurie.
Megjithatë, zyrtarët britanikë nuk morën parasysh vërejtjet e Uashingtonit.
“Kur ju lejoni që informacioni i qytetarëve tuaj, ose informacionin i sigurisë kombëtare të kalojë në rrjetin, në të cilin Partia Komuniste e Kinës ka një mandat ligjor për ta marrë, atëherë kjo krijon rrezik”, u tha Pompeo gazetarëve.
“Jam shumë i sigurt se dy kombet tona, do të gjejnë një mënyrë, për të punuar së bashku në zgjidhjen e dallimeve”, shtoi ai.
Uashingtoni dyshon se Huawei bashkëpunon me qeverinë kineze dhe se të dhënat e përdoruesve të saj nuk janë të sigurta.
Huawei me qendër në Kinë, i ka mohuar vazhdimisht akuzat e Uashingtonit.
Vendimi i Britanisë së Madhe për Huawei-n vjen në një kohë kritike, derisa vendi përgatitet të largohet nga Bashkimi Evropian më 31 janar, dhe të fillojë negociatat për një marrëveshje tregtare me Shtetet e Bashkuara. /Opinion.al
