Këshilli i Ministrave ka miratuar sot lirimin nga detyra të zv/ministrit të Ekonomisë dhe Financave, Erjon Luçi.
Vendimi është firmosur sot nga zv/kryeministri Braçe për shkak se kryeministri Rama ndodhet në Bruksel.
“Në mbështetje të nenit 100 të Kushtetutës dhe të pikës 2, të nenit 6, të ligjit nr.9000, datë 30.1.2003, “Për organizimin dhe funksionimin e Këshillit të Ministrave”, me propozimin e Kryeministrit, Këshilli i Ministrave
V E N D O S I: Erjon Luçi, zëvendësministër i Financave dhe Ekonomisë, të lirohet nga kjo detyrë.”, thuhet në vendimin e Këshillit të Ministrave
Erjon Luçi është një nga makroekonomistët më të njohur në vend. Ai është diplomuar në Fakultetin e Ekonomisë, Universiteti i Tiranës në vitin 1996. Ka kryer studimet Master në Ekonomi pranë Universitetit Staffordshire në Angli (1999) dhe një doktoraturë (2002) nga i njëjti universitet, mbi Ndërmjetësimin Financiar në Vendet e Tranzicionit, me fokus Shqipërinë.
Ai filloi karrierën e mësimdhënies pranë Fakultetit të Ekonomisë, UT deri në vitin 1999, vit kur iu bashkua stafit të Bankën së Shqipërisë, së pari si konsulent e më pas si Drejtor i Departamentit Kërkimor ku shërbeu për tre vjet. Në vitin 2006, ai u punësua pranë zyrës së Bankës Botërore në Shqipëri në postin e Ekonomistit të Lartë, ku për 7 vjet drejtoi projekte në lidhje me Reduktimin e Varfërisë dhe Menaxhimin Ekonomik.
Në vitin 2013 ai u emërua zëvendësministër i Financave, detyrë nga e cila u lirua ditën e sotme për motive ende të panjohura. /Opinion.al
