Ditën e sotme u publikua në media lajmi që Gjykata e Fierit ka vendosur lirimin me kusht të anëtarit të bandës kriminale të Durrësit, Sardian Sulejmani. Vendimi për lirimin e Sulejmanit mban firmën e gjyqtarit Piro Sota.
Në njoftimin e Gjykatës thuhej se; “Urdhërohet lirimi i menjëhershëm i të dënuarit Sardian Sulejmani nga IEVP Fier”.
Ndërkohë, mësohet se pas lirimit, Sardian Sulejmani do të punojë si punëtor terreni në kompaninë “Kombi Invest”, pasi ai ishte tip i qetë dhe i qëndrueshëm emocionalisht.
“Me aktin ‘Premtim për lidhje kontrate pune’ të dt.17.07.2019, administratori i shoqërisë ‘Kombi Invest’ sh.p.k, Ulis Gjata , ka marrë përsipër punësimin e kërkuesit me detyrën “punetor tereni” në rast se ai do të lirohet nga burgimi”, shkruhet në njoftimin e Gjykatës.
LEXO EDHE: Pas Endrit Dokles,lirohet nga burgu një tjetër anëtar i bandës së Durrësit
Një ndër arsyet që i siguroi Sulejmanit lirimin me kusht fakti se ai nuk rezulton të ketë probleme me përdorimin e alkoolit, apo të lëndëve narkotike, faktor i cili ndikon ne proçesin e riintegrimit të të dënuarit në shoqëri dhe shërben si faktor parandalues në kryerjen e sjelljeve devijante në shoqëri. Të dënuarit Sardian Sulejmani i kishte mbetur për të vuajtur dënimin prej 4 vite 10 muaj e 17 ditë burgim.
Sulejmani rezulton i dënuar në korrik të vitit 2014 nga Gjykata e Lartë, me 25 vite burgim për akuzën e “Vrasjes me paramendim të mbetur në tentativë” në dy raste ndaj Lulzim Berishës ngjarje të ndodhura në gusht të 2005 dhe “Vrasjes me paramendim” të Avni Gashit ndodhur në tetor 2005 në Tiranë. Për të dyja këto krime që është dënuar Sulejmani ishte dënuar dhe Endrit Dokle, nga gjykata, pasi dy miqtë kanë bashkëpunuar në këto ngjarje kriminale.
Bëhet me dije se, Sulejmani prej 3 muajsh qëndron i lirë, pasi në muajin tetor 2019 gjykata e Fierit dhe më konkretisht gjyqtari Piro Sota, ka vendosur t’i pranojë kërkesën për lirimin me kusht Sulejmanit./ Opinion.al
