Ish-Ambasadori amerikan, William Walker, i cili gjatë vitit 1999 ka shërbyer si shef i Misionit Verifikues të OSBE-së në Kosovë, shprehu kundërshtimin e tij për të gjithë ata që nuk e pranojnë masakrën Reçakut, e ndodhur me më 15 janar të vitit 1999.
Walker aktualisht ndodhet në Kosovë për 21-vjetorin e masakrës së Reçakut, ku forcat serbe kanë vrarë 45 civilë shqiptarë.
Duke folur në një konferencë në Prishtinë, ai bëri polemikë në distancë me presidentin e Serbisë, Aleksandar Vuçiç, i cili ka thënë se masakra e Reçakut nuk ishte e vërtetë. Walker tha se kur i dëgjon deklaratat e Vuçiçit, iu rikujtuan ato të Sllobodan Millosheviçit, i cili sipas tij fliste njësoj për Reçakun.
“Unë nuk jam këtu sot të vërtetoj se Reçaku nuk ishte gënjeshtër. Bota e ka kuptuar se Reçaku ka ndodhur, ku dyzet e më shumë banorë të një fshati të pambrojtur janë masakruar. Aty është kryer një krim lufte dhe është kryer nga forcat e sigurisë së Beogradit, nën komandën e Sllobodan Millosheviçit. Njerëzit më pyesin rreth reagimit tim ndaj presidentit serb, Vuçiç, i cili më ka quajtur një gënjeshtar, duke thënë se Reçaku nuk ka ndodhur. Reagimi im ishte se po dëgjoj fjalët e Sllobodan Millosheviçit edhe një herë. Reçaku ka ndodhur, bota mësoi për të, bota reagoi”,- tha Walker.
Presidenti serb, Aleksandar Vuçiç, ka deklaruar më herët se “krimi në Reçak ka qenë i fabrikuar”, deklaratë e cila ka nxitur reagime të ashpra të autoriteteve të Kosovës, që kanë cilësuar këtë deklaratë si mohim të krimeve të luftës.
