Ministri i Brendshëm, Sandër Lleshaj ka zhvilluar këtë të shtunë një takim me 12 drejtoritë vendore të policisë. Në një situatë të pazakontë, ministri Lleshaj ka shpalosur edhe prioritetet e Policisë së Shtetit për vitin 2020.
E sipas ministrit dy prioritetet kryesore janë lufta kundër krimit të organizuar dhe siguria rrugore. Gjithashtu, ai tha se shpejt do të jetë gati dhe miratohet paketa e njohur si “KÇK”. Po teksa “boja e prioriteteve është tharë” në letrën e ministrit, panorama reale është krejt e kundërta.
Në vetëm dhjetë ditët e para të 2020-ës, janë regjistruar katër vrasje të rënda në vend. Dy prej tyre, atentate ende pa autorë përpara drejtësisë, ndërsa dy vrasjet tjera, krim brenda në familje, me autorë pas hekurave.
Vrasja e parë u regjistrua në fshatin Gjerbës të Mallakastrës në datën 5 janar, ku një 16 vjeçar, Luis Saliaj, vrau nusen e xhaxhait të tij, Drita Saliaj. 16 vjeçari, së bashku me dy shokë të tij, Sindi Shehaj, po 16 vjeç dhe Ervis Zotaj 26 vjeç, shkuan për të vjedhur në shtëpinë e Drita Saliajt, por pas rezistencës së saj, e godasin dhe e hedhin ne rezervuarin e fshatit.
Po në datën 5, regjistrohet një tjetër vrasje, këtë herë në qytetin e Bajram Currit. Atentati mafioz la të vdekur, Guxim Gjyriqi, 47 vjeç, i cili sapo doli nga një restorant në afërsi të karburantit të tij, u ekzekutua nga autorë ende të paidentifikuar. Makina me të cilët autorët hapën zjarr, u gjet e djegur në fshatin Golaj të Hasit. Guxim Gjyqiri dyshohet se u vra për hakmarrje për shkak të lidhjeve të tij me Fatmir Haklajn.
Dy ditë më pas, në datën 7 janar, në qendër të qytetit të Rrëshenit, ekzekutohet me snajper, Kastriot Reçi, biznesmen. Ekzekutori, një qitës i përgatitur dhe me precision të lartë, kishte qëndruar në katin e fundit të një pallati, i cili ishte i pabanueshëm, për të kryer vrasjen me vetëm një plumb.
Ndërsa data 9 janar, regjistroi vrasjen makabre në Paskuqan, ku Erdet Capoku, pasi kishte përndjekur dhe kërcënuar për disa muaj me radhë kunatën e tij, Enkeleda Çapokun, e vret atë mbrëmjen e së enjtes. Një ditë më pas ai vihet në pranga nga policia.
Çdo kush mund të thotë që asnjë shtet nuk ka një efektiv policie për banor, por të paktën policia bën punën për të cilën paguhet nga taksat tona. Më shumë se sa prioritetet e ministrit, duket se në Shqipëri zbatohet “rregulli i artë” i kryeministrit Edi Rama: “Ata kokat hënkshin njëri me tjetrin”./ Opinion.al
