Një ngjarje e rëndë ka ndodhur mbrëmjen e djeshme në Paskuqan ku për pasojë mbeti viktimë një grua 30-vjeçare e identifikuar si Enkeleda Çapoku. Sipas policisë ajo kishte humbur jetën si pasojë e goditjeve me një send të fortë. Nëna e viktimës ka dhënë detaje të tjera lidhur me ngjarjen në një prononcim për “News 24”.
Sipas saj, autori Erdet Çapoku, kunati i viktimës, ishte një person problematik. Ajo rrëfen se ai është marrë me drogë dhe se e përndiqte Enekeledën kudo nëpër qytet kur ajo dilte me vajzën e saj 18-vjeçare. Nëna e viktimës thotë se ai i bënte foto dhe video dhe ia niste të vëllait, i cili vuante dënimin me 10 vite burg për drogë, ndërsa Enkeledës i dilte përpara dhe e kërcënonte. Për këtë arsye Enkeleda me të ëmën kishin bërë denoncim në Komisariatin e Kamzës. Sipas dëshmisë së saj, Erdeti ishte paralajmëruar për të mos iu afruar më Enkeledës dhe vajzës së saj. Por kjo nuk e ndaloi atë të kryente krimin makabër.
Mbrëmjen e djeshme, sipas dëshmisë së nënës së Enkeledës ai kishte ardhur në banesë dhe kishte shqyer derën. Ajo thotë se të trija, bashkë me të bijën dhe mbesën po flinin në një dhomë.
“Erdhi shqeu deren, Enkeleda bërtita, erdhi Erdeti na vrau”, ka treguar nder te tjera nena.
Ajo tha se ishte goditur e para në shpatull me levë. Më pas ai kishte tentuar të godiste vajzën 18-vjeçare por Enkeleda e kishte ndaluar këtë gjë duke pësuar vetë goditjen.
Nëna tregon se kishte parë vajzën e gjakosur teksa përpiqej të ndizte dritën e dhomës dhe në këtë moment ajo thotë se autori i kishte prerë damarët e dorës. Sipas saj autori kishte edhe thikë me vete me të cilën kishte goditur Enkeledën. /Opinion.al
