Sekretari amerikan i Shtetit, Mike Pompeo, është shprehur se Irani po punon “në mënyrë aktive” për të minuar procesin e paqes në Afganistan.
Gjatë një konference për media, Pompeo tha se Irani ka raporte me talibanët dhe grupet tjera militante në Afganistan. Sipas tij, raportimet se komandanti iranian, Qasem Soleimani ka qenë në mision diplomatik në Irak kur u vra nga ana e Shteteve të Bashkuara, janë plotësisht të pavërteta.
Më 3 janar, Shtetet e Bashkuara përmes sulmeve ajrore vranë udhëheqësin e forcës Kuds të Iranit, Qasem Soleimani. Pas vrasjes së Soleimanit, Irani ka kërcënuar se do të hakmerret ashpër ndaj SHBA-së
Uashingtoni e ka fajësuar Soleimanin për vrasjen e trupave amerikane në Irak dhe e ka akuzuar atë për komplot për sulme të reja pak para vrasjes së tij, javën e kaluar pranë aeroportit të Bagdadit.
Soleimani ka udhëhequr milicitë iraniane në konfliktet në Siri, Irak, Liban dhe Jemen. Shtetet e Bashkuara e kanë konsideruar atë si terrorist./ Opinion.al
