Policia e Lezhës ka kërkuar ndihmën e qytetarëve ndërsa ka vënë shpërblim 2 milionë lekë të rinj, për të gjetur autorët e vrasjes së 47-vjeçarit Kastriot Reçi.
“Kushdo që mund të ketë informacion të vlefshëm, të telefonojnë në numrin unik 112 dhe në numrin në dispozicion për këtë qëllim 069 41 06 449, duke ju garantuar anonimat të sigurt dhe reagim të menjëhershëm”, njofton policia. Për zbardhjen e kësaj ngjarjeje është ngritur grupi i posaçëm hetimor, me specialistë nga Departamenti i Policisë Kriminale, DVP Lezhë dhe Komisariati i Policisë Mirditë, nën drejtimin e Prokurorisë dhe vijon puna për grumbullimin dhe administrimin e çdo prove sado të vlefshme që do t’i shërbejë hetimit.
47-vjeçari Kastriot Reçi është vrarë me armë zjarri paraditen e kësaj të marte në qytetin e Rrëshenit. Ai është qëlluar pranë një lokali. Kastriot Reçi ka pasur në pronësi televizionin lokal, ndërsa familjarët e tij disa karburante.
Kalimtarë të rastit e kanë dërguar Reçin në spital, por nuk ka mundur t’u mbijetojë plagëve të shkaktuara nga plumbat, duke ndërruar jetë.
Dy vite më parë, Kastriotit i kanë vrarë një vëlla në Itali, ndërsa ka dyshime se kjo vrasje është në vazhdën e disa vrasjeve të ndodhura në Rrëshen katër vitet e fundit. Për këtë arsye, pranë policisë lokale të Mirditës ka shkuar vetë ministri i Brendshëm, Sandër Lleshaj, i cili po informohet mbi këtë ngjarje dhe pistat e policisë për identifikimin dhe kapjen e autorëve.
Vrasja e biznesmenit dhe pronarit të televizionit lokal “Media Plus” është e dyta brenda 48 orëve. Një ditë më parë, në qytetin Bajram Curr të Tropojës u vra biznesmeni 47 vjeçar, Guxim Gjyriqi, pronar i një pike karburanti dhe një restoranti në qytetin Bajram Curr. Ai u qëllua për vdekje nga një makinë, e cila u gjet e djegur rreth 60 kilometër nga vendi i ngjarjes, në fshatin Golaj të Hasit. Deri tani, edhe për këtë vrasje, nuk ka përsona të dyshuar apo të ndaluar./ Opinion.al
