Presidenti Donald Trump deklaroi se ish-ambasadorja e SHBA në Ukrainë, Marie Yovanovitch, nuk pranoi të vinte foton e tij në ambasadën amerikane në Ukrainë.
Trump tha gjatë emisionit të mëngjesit të Fox News se ‘ish-ambasadorja Marie Yovanovitch “nuk donte të varte foton time në ambasadë” në Ukrainë. Megjithatë Presidenti i SHBA nuk dha detaje të mëtejshme rreth kësaj çështjeje.
Zonja Yovanovitch dëshmoi javën e kaluar se ajo u pushua nga puna për “akuza të rreme” nga njerëz me “qëllime të dyshimta”.
Ajo ishte një nga 12 dëshmitarët që dëshmoi gjatë dy javëve të fundit në hetimin që po zhvillohet në Dhomën e Ulët të Kongresit, i cili po shikon abuzimin e supozuar të pushtetit nga presidenti dhe që mund të sjellë shkarkimin e tij.
Në një lidhje telefonike me ‘Fox and Friends’, Trump iu referua zonjës Yovanovitch si “ajo gruaja” dhe tha se ai kishte dëgjuar “gjëra të këqija për të”.
“Kjo ambasadore, për të cilën të gjithë thonë se ishte aq e mrekullueshme,” tha zoti Trump, “nuk donte të varte fotografinë time në ambasadë.”
Ai shtoi se avokati i tij personal, Rudy Giuliani, “nuk i kishte thënë gjëra të mira” për të.
Giuliani ka dalë në mënyrë të përsëritur në seancat e hetimit për shkarkimin e presidentit pasi dëshmitarët thonë se ai ndiqte një kanal të jo zyrtar në marrëdhëniet SHBA-Ukrainë.
“Ajo tha gjëra të këqija rreth meje, ajo nuk donte të më mbronte dhe unë kam të drejtë të ndryshoj ambasadorin,” shtoi Trump.
Kjo nuk ishte hera e parë që presidenti sulmon zonjën Yovanovitch.
Presidenti kaloi një pjesë të konsiderueshme të intervistës televizive të së premtes duke diskutuar për një teori konspirative se ishte Ukraina – jo Rusia – që ishte përzier në zgjedhjet presidenciale në SHBA 2016.
Këto pretendime janë quajtur “një histori fiktive” nga dëshmitarja Fiona Hill , ish-zyrtare e inteligjencës së Shtëpisë së Bardhë dhe eksperte e Rusisë.
Në intervistën e tij, Trump mbrojti gjithashtu vendimin e tij për dërgimin e avokatit të tij Rudy Giuliani në Ukrainë. Ai tha se ish kryetari i bashkisë së New York City “është një luftëtar i madh krimit” dhe “figurë legjendare”.
“Kur keni të bëni me një vend të korruptuar, Rudy Giuliani ka kredenciale për shkak të reputacionit të tij,” tha presidenti. /Opinion.al
