Në konferencën e saj për mediat, kryetarja e Lëvizjes Socialiste për Integrim, Monika Kryemadhi ka komentuar vendimin e presidentit Meta për të shpallur jo të mirëpritur në Presidencë, ambasadorin e OSBE në Tiranë, Bernd Borchardt.
Ajo e ka cilësuar fyes për të gjithë shqiptarët veprimin e ambasadorit dhe ka ironizuar se ai mund të kishte kandiduar për Gjykatën Kushtetuese.
“Borchard mund të kishte kandiduar për Gjykatën Kushtetuese. Ëngjëll Agaçi mund ta kandidonte dhe mund të kishte qenë edhe në vakancat e Kuvendit. Edhe pse Kuvendi i kishte votat priti afatin e fundit për të miratuar emrat. Për gishtin e mesit ta marri mbrapsht, çdokush që fyen shqiptarët. Këta janë individë që fyejnë shqiptarët, integritetin e shqiptarëve. Këta individë marrin përsipër që të bëjnë një fyerje të tillë. Çdo njeri ka mënyrën e vet për të shprehur protestën. Si diplomat mund të bënte ankesë me shkrim në ministrinë e Jashtme”.
Kryemadhi përmendi gjatë fjalës së saj edhe ish ambasadoren e BE në Tiranë, Romana Vlahutin lidhur me qëndrimet e saj në kohën e miratimit të Reformës në Drejtësi.
“Vlahutin do të thoshte hajde të blejmë votat e opozitës por ndërkohë nuk bëhej fjalë për të blerë deputetët e opozitës sepse ishin votat e LSI-së ato që garantonin por bëhej fjalë për të miratuar një reformë në drejtësi me unison, me konsensus të plotë politik. Nëse do kishim miratuar një reformë në drejtësi pa PD-në kur ishte partia kryesore opozitare dhe ishte jashtë këtij procesi, normal që kjo reformë në drejtësi nuk do ishte e besueshme jo vetëm për SHBA por as për BE.”
Kryemadhi thumboi edhe kryebashkiakun e Tiranës, Erion Veliaj kur u pyet se si do të reagonte ish-ambasadorja e BE në rast se do të ishte në vend të ambasadorit Borchardt.
Pyetje: Mirë zoti Borchardt ngriti gishtin, po të ishte znj. Vlahutin çfarë do ngrinte?
Kryemadhi: Atë nuk e dimë, pyesni Erion Veliajn më mirë. /Opinion.al
