Në Bulevardin Dëshmorët e Kombit janë ekpozuar portretet e 100 personave që mbajnë titullin “Heroi i Popullit” por kjo ka ngjallur një debat përsa i përket kontributit real të tyre.
Drejtori i Institutit të Krimeve të Komunizmit, Agron Tufa është shprehur se mes këtyre figurave ka persona që i kanë shërbyer sigurimit të shtetit dhe nga ata që janë vrarë pas lufte. Si shembull ai sjell Nuri Luçin, oficer i ndjekjes së sigurimit të shtetit i cili është vrarë duke kërkuar grupet e rezistencës anti-komuniste si dhe Baba Faja Martaneshi, Hysen Mecolli, Nimete Prgonati, Shyqyri Ishmi, Abaz Shehu të cilët nuk kanë vdekur gjatë luftës, por në përpjekje me forcat e brendshme politike.
Tufa shton se ky dekorim i Bulevardit i ngjan një profanie dhe ky është një provokim nga ana e organizatorëve. Sipas tij disa prej këtyre figurave që kanë rënë në luftë janë përpjekur të përhapin hapjes së genocidit dhe ndezjes së luftës civile. Institucionit që ai drejton nuk i është kërkuar asnjë mendim ose dokument në lidhje me këtë ekspozitë thotë Agron Tufa.
Ndërsa Drejtori i Arkivit të Shtetit Ardit Bido thotë se ekspozita është realizuar nga Arkivi i Shtetit, ndërsa lista është propozuar nga Komisioni Shtetëror i Festimeve. Ai thotë gjithashtu se ka ardhur koha që të analizohen titujt e heronjve pasi ka emra të cilët nuk duhet të jenë.
Historiani dhe Drejtori i Akademisë së Studimeve Albanologjike Maringlen Verli është i mendimit se prezantimi i i heronjve dhe i figurave të tilla kërkon një analizë të hollësishme para se të publikohen.
Figurat e 100 heronjve do të prezantohen deri në fund të nëntorit në bulevardin “Dëshmorët e Kombit”. /Opinion.al
