Breshëritë e plumbave të kallashnikovit tronditën ditën e djeshme Durrësit, duke lënë të plagosur në vendin e quajtur “Mbikalimi i Shkozetit”, prokurorin Arjan Ndoj, Andi Malokun dhe Aleksandër Laho (Landi Muharremi).
Ky i fundit nuk është një emër i panjohur për Policinë e Shtetit, pasi është i skeduar disa herë për ngjarje të rënda kriminale, pjesa më e madhe e të cilave nuk i është provuar. Aleksandër Laho, i cili njihet me pseudonimin “Rrumi”, gjatë atentatit të bërë pasditen e djeshme mori një plumb në nofull.
“I forti i Shijakut”, me pseudonimin “Rrumi”, është miku i prokurorit Ndoj, ndërsa ka ndryshuar emrin të paktën dy herë. Fillimisht quhej Pëllumb Muharremi, më pas Landi Muharremi, emër i cili është shënuar shpesh në regjistrat e Policisë së Durrësit, por edhe të Tiranës. Ndërsa së fundmi, 48- vjeçari e kishte ndryshuar sërish emrin dhe në dokumente figuron si Aleksandër Laho.
Aleksandër Laho (Landi Muharremi) është denoncuar dhe nga Partia Demokratike për lidhjet e tij me Partinë Socialiste dhe eksponentët e saj në qytetin e Durrësit.
Kryetari i PD, Lulzim Basha, më 28 tetor 2018, ka deklaruar se Aleksandër Laho, i njohur me pseudonimin “Rrumi” ka ushtruar presion ndaj qytetarëve dhe se ka mbledhur vota për qeverinë.
Basha ka thënë një vit më parë se Aleksandër Laho punonte së bashku me ish-kreun e Bashkisë së Durrësit, Vangjush Dakon, duke kërcënuar qytetarët për votën.
“Sepse vendi nuk qeveriset nga një qeveri e dalë nga vota juaj. Vendi nuk qeveriset nga një qeveri e zgjedhur me votën e popullit. Kur vjen në pushtet me këtcënimet e Rrumit, Rrumi e ka ky që bënte kërdinë për zgjedhje? Ushtari i “Xhuxhit”, është në Sukth? Dakord. Pra, kur vjen në pushtet mbi zullumet e Rrumit e të Gjush Dakos, mendjen e ke të punosh për Rrumin e për Gjush Dakon e për bandat e tjera të Durrësit e të Shijakut. Nuk të shkon mendja për njerëzit e thjeshtë, për hallexhinjtë, për fermerët, për të papunët, për rininë. I vetmi shqetësim i një qeverie të dalë nga vita e krimit dhe jo e qytetarëve është si të vazhdojë të mbrojë krimin e të bëjë biznes me krimin,”-shprehej Lulzim Basha më 28 tetor 2018.
Hetimi për Aleksandër Lahon, “Rrumin”
Ndonëse hetimet për atentatin janë përqendruar te vrasja e mbetur në tentativë, për shkak të detyrës së prokurorit Arian Ndoja, Policia dhe Prokuroria nuk e përjashtojnë mundësinë që objektiv i atentatit mund të ketë qenë edhe Landi Muharremi. Ky i fundit ka lidhje e afërta me Muharrem Muharremin, i përfshirë në konfliktin për pronat te Gjiri i Lalzit, që humbi biznesmeni libanez Fadi Mitri.
Më 14 shtator të vitit 2016, Policia e Tiranës shoqëroi 3 persona të dyshuar si autorë të rrahjes së biznesmenit amerikano-libanez, Fadi Mitri, në rrugën e Rinasit. Të dyshuarit ishin të tre nga Shijaku dhe sipas burimeve nga grupi hetimor në atë kohë u dyshuan se mund të ishin paguar ose porositur nga persona të tjerë për të dhunuar e kërcënuar investitorin e huaj.
Me një automjet tip “Tuareg”, me targa italiane, ata përplasën makinën “Mitsubishi” ku ndodhej biznesmeni me familjen. Tri vite më parë, burimet thanë se vetë i plagosuri e ka tërhequr denoncimin që iu mor disa orë pas ngjarjes në spitalin privat ku mori mjekim. Megjithatë, Policia i kreu veprimet me iniciativë, duke qenë se ishin përballë dy veprave penale, siç ishte “Plagosja e rëndë me dashje” dhe “Kanosja”.
Burime nga Policia thanë në atë kohë se tre personat e shoqëruar në lidhje me ngjarjen e datës 10 shtator 2016 ishin: Skënder Krahja, Landi Muharremi dhe Arben Mërkuri, të tre nga Shijaku. Njëri prej tyre, Krahja, u arrestua pasi iu gjet një sasi hashashi në xhep. Ndërsa në lidhje me plagosjen e rëndë të biznesmenit Fadi Mitri, nuk u gjetën prova të mjaftueshme që t’i lidhnin me ngjarjen. Por, përveç kësaj ngjarjeje, Landi Muharremi u hetua edhe për rrahjen e një avokati vitin e kaluar, ngjarje për të cilën po ashtu nuk u arrestua asnjëherë.
Biznesmeni libanez u rrah barbarisht për pronën te Gjiri i Lalzit
Biznesmeni me shtetësi amerikane dhe kombësi libaneze, Fadi Mitri, u masakrua me shkop bejsbolli në rrugën e Rinasit, pranë kryqëzimit të Laknasit në Tiranë, më 10 shtator të vitit 2016. Mitri, në atë kohë 55 vjeç, po udhëtonte në drejtim të kryeqytetit me automjetin tip “Mitsubishi”, që drejtohej nga shoferi i tij shqiptar, me iniciale E.M., kur është përplasur qëllimisht nga një automjet tjetër. Ai ishte administrator i kompanisë nga Katari, “Omnix Albania”, e cila do të ndërtonte një resort gjigant me vlerë 180 milionë euro në Gjirin e Lalzit.
Biznesmeni i huaj ka qenë i shoqëruar nga bashkëshortja dhe fëmija në momentin kur u sulmua barbarisht me shkop bejsbolli. Ai është goditur 10 herë në kokë dhe 7 herë të tjera në gjymtyrë e për pasojë ka hematoma të shumta, ndërsa njërën këmbë e ka të thyer. Kanë qenë tre persona që e kanë sulmuar, pasi i kanë përplasur makinën, me të cilën ai udhëtonte në rrugën e Rinasit. Ata janë larguar me një makinë tip “Tuareg” me targa të huaja, që ende nuk është gjetur nga Policia. Sipas dëshmisë që Fadi Mitri dhe shoferi i dhunuar kanë dhënë para hetuesve, njëri nga autorët ka filmuar të gjithë skenën.
Vetë biznesmeni i plagosur ka arritur të fiksojë targën e automjetit “Tuareg”, ku ndodheshin autorët, të cilën edhe e ka fotografuar, pasi mjeti gjatë gjithë rrugës kryente manovra të rrezikshme dhe parakalonte makinën e tij. Burimet thanë se makina ka qenë me targa italiane, të vjetra, që pas verifikimeve nuk kanë rezultuar të kenë kaluar në rrugë zyrtare kufirin shqiptare.
Sulmi ndaj tij u dyshua se kishte lidhje me investimin që do të kryhej në Gjirin e Lalzit, nga i cili ai u tërhoq më pas dhe u largua nga Shqipëria. Të paktën këto ishin dyshimet e para të Policisë, nisur nga ato çka vetë sipërmarrësi i huaj ka deklaruar pas sulmit. Sipas dëshmisë që ai ka dhënë para hetuesve, mësohet se autorët që e kanë sulmuar, e kanë kërcënuar duke i thënë: “Ik nga Shqipëria, ose ndërprit punimet…”.
EMRAT
1.Landi Muharremi.
2. Pëllumb Muharremi.
3. Aleksandër Laho.
4. Pseudonimi “Rrumi”./ Opinion.al
