Pas më shumë se dy orë, ka përfunduar mbledhja e Komisionit të Posaçëm për Reformës Zgjedhore, ku deputetët u njohën me përmbajtjen e draftit të përpiluar nga ekspertët. Deputetët e opozitës kërkuan të dinë se përse në draft nuk është përfshirë depolitizimi i administratës zgjedhore në përmbajtje.
“Projekti ka disa propozime të guximshme, dhe radikale, duke e kthyer “de facto” Qeverinë, gati në qeveri gjysmë teknike, sepse ndalohet gjashtë muaj para zgjedhjeve aktiviteti i mirëfilltë politik”, tha Gjiknuri.
Megjithatë, opozita parlamentare këmbënguli se nuk do të votojë asnjë draft pa pasur në të ndryshimin e sistemit në përmbajtje. Mbledhja e radhës do të zhvillohet javën e ardhshme.
“Ne kemi rënë dakord që ata të vijnë me një propozim për sistemin zgjedhor dhe ai të diskutohet”, tha Gjinkuri.
Sa i përket propozimeve të bërë nga opozita, që ka ngritur grupin e saj të punës, Gjinkunri tha se pavarësisht se ata nuk e njohin komisionin, fakti që po punojnë është gjë e mirë.
“Nëse përgatisin draftet e tyre, duke ja dhënë edhe OSBE-së, ne i marrim dhe ne do të bëjmë çmos që çdo propozim i opozitës që është në përputhje me rekomandimet e OSBE/ODIHR, do t’i marrim parasysh dhe mbase do të jetë një rast i rrallë ku dakordësia e kodit zgjedhor do të shtrihet edhe me partitë jashtë parlamentare”, u shpreh Gjiknuri.
Në të njëjtijn orar me Komisionin e Posaçëm për Reformës Zgjedhore edhe PD dhe aleatët diskutuan mbi këtë reformë në selinë blu.
Sekretari i Përgjithshëm, Gazment Bardhi, tha se nga takimi i sotëm palët janë dakordësuar për propozimet që do të bëjnë për dy çështje kryesore, si financimi i partive politike dhe fushata zgjedhore, dhe administrimi zgjedhor.
“Ne e kemi propozuar një mekanizëm për të bashkëpunuar me palën tjetër. Në fakt duhet të ishte Qeveria të kërkonte bashkëpunimin e opozitës në realizimin e këtij kushti. Bundestagu e ka bërë të qartë që kërkon një reformë zgjedhore me pjesëmarrjen e të gjitha partive politike”, tha Bardhi.
Ai akuzoi socialistët që nuk kanë interes të përmbushin këtë kusht të vendosur nga ndërkombëtarët. “Detyra e palës tjetër është të mendojë për interesin e qytetarëve, për hapjen e negociatave, të tregojë përgjegjshmëri para kushteve dhe kritereve të vendosura nga partnerët dhe të pranojë mekanizmin që kemi propozuar. E kundërta do të ishte thellim i krizës, tregues i papërgjegjshmërisë dhe prova e fundit që tregon se Edi Rama nuk dëshiron integrimin europian të Shqipërisë”./ Opinion.al
