Presidenti i Turqisë, Erdogan, tha se Ankaraja do të rinisë operacionin kundër forcave kurde në veri të Sirisë të martën në mbrëmje, nëse ato nuk tërhiqen nga “zona e sigurt”.
Turqia, me këmbënguljen e SHBA-së, ra dakord të enjten për të ndërprerë ofensivën derisa luftëtarët kurdë të tërhiqen rreth 30 kilometra larg kufirit të saj.
“Nëse premtimet mbahen deri të martën mbrëma, zona e sigurt do të zgjidhet. Nëse dështojnë, operacioni do të rinisë sapo të bëhen 120 orë”, tha Erdogan.
Ai shtoi gjithashtu se forcat e armatosura turke do të mbeten në rajon, pasi “siguria e kërkon një gjë të tillë”.
Por, Vëzhguesi Sirian i të Drejtave të Njeriut, grup që monitoron luftën në Siri tha se sulmet ajrore të Turqisë kanë vazhduar edhe të premten në fshatin Bab al-Kheir dhe 14 civilë janë vrarë.
Turqia e ka nisur operacionin e saj më 9 tetor për të pastruar, siç ka thënë, zonën e saj kufitare nga terroristët./Opinion.al
