Ish-kryeministri italian Matteo Renzi ka njoftuar se do të largohet nga partia Demokratike (PD) e qendrës së majtë për të formuar partinë e tij, duke destabilizuar potencialisht koalicionin e vjetër qeverisës.
“Unë kam vendosur të largohem nga PD dhe të ndërtoj së bashku me të tjerët një shtëpi të re për të bërë politikë ndryshe,” shkroi Renzi në Facebook, një javë pasi koalicioni në dukje i pamundur i PD me Lëvizjen Pesë Yje (M5S) fitoi një mocion besimi në parlament .
Renzi nuk është vetë pjesë e qeverisë së re, e cila u krijua pas mosmarrëveshjeve me liderin e ekstremit të djathtë, ish-ministrin e brendshëm Matteo Salvini. Ky i fundit bëri thirrje për zgjedhje të parakohshme të cilat sipas tij do ta bënin kryeministër.
Por Renzi, i cili u përshëndet si një reformator kur u bë kryeministri më i ri i Italisë në moshën 39 vjeç në vitin 2014, ishte një figurë përçarëse brenda PD-së, veçanërisht për të majtën, e cila është kryesisht besnike ndaj kryetarit të partisë, Nicolas Zingaretti.
“Pas shtatë vitesh konflikt mes anëtarësh, unë mendoj se duhet të kemi parasysh që vlerat tona, idetë tona, ëndrrat tona, nuk mund të jenë çdo ditë objekt grindjesh të brendshme,” shkroi Renzi.
Ai dha dorëheqjen si kryeministër në vitin 2016 dhe marrëdhëniet e krisura brenda PD-së nxitën spekulime të përsëritura se ai do të largohej për të formuar partinë e tij, më shumë qendrore.
“Fitorja që morëm në parlament kundër populizmit dhe Salvinit ishte e rëndësishme për të shpëtuar Italinë, por nuk është e mjaftueshme,” shkroi Renzi.
Mediat italiane raportuan se rreth 30 ligjvënës mund të deklarojnë besnikërinë e tyre ndaj Renzit, por ai tha se ai do të vazhdojë të mbështesë qeverinë e kryeministrit, Giuseppe Conte. /Opinion.al
