Kreu i Bindjes Politike, Astrit Patozi ka lexuar raportin e OSBE/ODIHR-it për zgjedhjet e 30 qershorit si një thirrje për zgjedhje të parakohshme.
“Nëse duam që raportin e OSBE/ODIHR-it ta lexojmë me realizëm duhet të nisim që sot betejën për zgjedhje të parakohshme, sepse nuk ka më dilema për kalbëzimin e plotë të “Rilindjes”, si filozofi dhe si praktikë qeverisëse” shkruan Patozi.
Megjithatë ai shton se këto zgjedhje duhet të zhvillohen pasi të zhbëhen ndryshimet kushtetuese të vitit 2008.
“Por, sigurisht, që zgjedhjet e reja nuk do të kishin asnjë kuptim pa një reformë të plotë dhe rrënjësore, e cila në radhë të parë duhet të çrrënjosë pushtetin absolut të kryetarëve të partive, duke mos u dhënë praktikisht asnjë mundësi njerëzve të zgjedhin përfaqësuesit e tyre.
Oferta e qartë dhe e detajuar për një sistem të ri politik, që nis me zhbërjen e ndryshimeve kushtetuese të 2008-ës dhe vijon me një reformë të thellë zgjedhore, duhet të jetë hapi i parë i opozitës për t’i dhënë vendit një zgjidhje afatgjatë për këtë krizë të rëndë politike” deklaron kreu i Bindjes.
Për Patozin zgjedhjet e 30 qershorit ishin edhe më keq se nga sa paraqiten në raportin e ODIR-it por ai nënvizon se përgjegjësitë për këtë situatë e ka jo vetëm mazhoranca por edhe opozita që bojkotoi zgjedhjet.
“Zgjedhjet e 30 qershorit ishin edhe më të këqija, se sa ato përshkruhen në raportin përfundimtar të OSBE/ODIHR-it….Një proces zgjedhor problematik dhe tërësisht të zhbalancuar, i cili kishte nisur mbrapsht që në çastin kur disa forca kryesore politike morën vendimin për të bojkotuar” shkruan Patozi.
Bindja Demokratike zgjodhi të bëhej pjesë e zgjedhjeve të 30 qershorit duke kundërshtuar frymën bojkotuese të opozitës dhe duke u përpjekur të krijojë një pol të ri alternative opozitar. Megjithatë ata nuk arritën të fitonin asnjë nga bashkitë ku kishin kandidatë. Bindja u regjistrua në limitet kohore në zgjedhje, madje në raportin e OSBE/ODIHR-it ky regjistrim konsiderohet jo i rregullt.
“KQZ-ja e regjistroi Partinë Bindja Demokratike si subjekt zgjedhor më 27 prill, megjithëse kjo e fundit u regjistrua si parti politike vetëm në 25 Prill, me një vendim gjyqësor që mori formë të prerë në 10 maj. KQZ nuk i kërkoi të partisë së sapo regjistruar BD që të mbledh nënshkrime mbështetëse siç e kërkon ligji” shkruhet në raportin e publikuar ditën e djeshme.
Në reagimin e tij Patozi nuk komenton këto konstatime të ODIHR-it pavarësisht se e konsideron atë realist. /Opinion.al
