Këshilli i Emërimeve në Drejtësi ka vendosur ti kërkojë Kuvendit të Shqipërisë dhe Presidentit të Republikës të shpallin vakancat për kandidaturat për anëtar të Gjykatën Kushtetuese.
Në mbledhjen e zhvilluar ditën e sotme KED zhvilloi proceset e relatimit të procedurave për vlerësimin e kandidaturave për vendet vakante në Gjykatën Kushtetuese, si edhe zhvilloi intervistat me të gjithë kandidatët e lejuar për kandidim. Arta Vorpsi, Elsa Toska, Fiona Papajorgji, Regleta Panajoti dhe Marsida Xhaferllari u intervistuan nga KED i cili tashmë do të shqyrtojë dokumentacionin voluminoz të çdo kandidati të lejuar, për njohje më të thelluar me të dhënat e jetës profesionale, me punimet shkencore dhe dokumentet e tjera profesionale të paraqitura për vlerësim nga kandidatët.
Sa i përket fillimit të procedurave të vlerësimit pikëzimit dhe renditjes së kandidatëve të lejuar për vendin vakant të Inspektorit të Lartë të Drejtësisë, KED vendosi ta shtyjë për një mbledhje tjetër me arsyetimin se kandidatët mund të ankimohen pranë Gjykatës Administrative të Apelit
Pas miratimit nga ana e KED të kandidatëve për Gjykatën Kushtetuese, lista përfundimtare e renditjes dhe aktet përkatëse të vlerësimit dhe pikëzimit do ti dërgohen organeve të emërtesës, Kuvendit dhe Presidentit të Republikës, në mënyrë që të ushtrojnë, sipas përcaktimeve të Kushtetutës, kompetencën dhe detyrimin kushtetues të zgjedhjes dhe emërimit të gjyqtarëve të Gjykatës Kushtetuese. /Opinion.al
