Të paktën 7 persona raportohet të kenë humbur jetën si pasojë e të shtënave në një lokal në Ohio të SHBA.
Kur nuk kanë kaluar as 24 orë nga sulmi në Teksas, një tjetër incident ndaj popullsisë civile ka goditur SHBA. Mediat vendase raportojnë se në Dayton, Ohio, në një bar të quajtur Ned Peppers ka patur një sulm me armë ndaj qytetarëve.
“Ai erdhi me një AR-15, kishte një jelek, mbrojtëse veshësh dhe filloi të qëllonte me breshëri kudo. Unë nuk kam pësuar dëme por ka viktima dhe të plagosur kudo … ata kanë marrë ambulanca. Është e tmerrshme unë kurrë nuk kam parë diçka të tillë më parë” shprehet një nga dëshmitarët e ngjarjes.
Raportohet gjithashtu se njëri nga autorët është qëlluar nga policia dhe se autoritetet janë në kërkim të një personi të dytë i cili mendohet të jetë larguar me një makinë nga vendngjarja.
Ende nuk bëhen të ditur motivet dhe dinamika e plotë e ngjarjes. Policia vendase ka bërë thirrje që qytetarët të ndihmojnë me informacione dhe të sigurojnë veten duke shmangur lëvizjet rreth zonës ku ndodhi masakra. /Opinion.al
