Debati për godinën e Teatrit Kombëtar po zgjat për më shumë se një vit dhe gjatë kësaj kohe komuniteti i artistëve që punojnë aty, por jo vetëm, kanë qenë të ndarë në mendimet e tyre për arsye të ndryshme.
Aktorja e njohur Raimonda Bulku, në kohën kur diskutohej nëse duhet shembur ose jo godina ekzistuese e Teatrit Kombëtar, është shprehur se ishte pro shembjes dhe ndërtimit të një Teatri të ri, pavarësisht se çfarë mund të ndërtohej përreth.
“Aty duhet të ketë një teatër shumë të mirë, ç’më duhet mua se çfarë ndërtohet anës teatrit, apo mbi teatër. Në qiell le të ndërtohet, s’kam ndonjë gjë; unë dua të ndërtohet një teatër. Nuk ka rëndësi fare se çfarë. Godina e teatrit duhet shembur, pa dyshim. Ne po përjetojmë kushte mizerabël. Unë nuk e di se si punojmë aty, është turp të punosh aty. Tani që u gjet Turbina, shumë mirë, ajo sallë është për atë zonë, atë lagje dhe si ajo duhet të ndërtohet edhe një në Kombinat, edhe një në Laprakë, që padyshim është një lagje afër Tiranës. Unë do të dëshiroja që të ngrihet një Teatër i ri Kombëtar, me parametra të tjerë” është shprehur Raimonda Bulku.
Këtë fjalë të sajën kryeministri Rama e postoi sot në një status të tijin në Facebook duke argumentuar se edhe një aktiviste e njohur e Partisë Demokratike ka mbështetur projektin e qeverisë për shembjen Teatrit Kombëtar dhe dhënien me konçesion të një kompanie private që të ndërtojë aty një godinë të re të inkorporuar në një kompleks biznesesh.
“Minoranca e zhurmshme dhe e verbër teatralo – politike, nuk përfaqëson asfare opinionin e shumicës së komunitetit të artistëve të skenës, për projektin e Teatrit Kombëtar! Ja çfarë mendon një aktore e njohur e skenës kombëtare, e cila jo vetëm s’ka asnjë lidhje me këtë shumicë qeverisëse, po ka qenë aktive si qytetare qysh në kohën e ndryshimeve historike dhe më pas edhe si deputete, në radhët e Partisë Demokratike” shkruan Rama dhe më pas citon fjalën e aktores Bulku.
Ajo nuk e ka vonuar përgjigjen e saj, duke postuar një foto të godinës së Teatrit në Instagram dhe duke shkruar se “Teatri i ri nuk duhet ndërtuar duke shkulur të vjetrin”.
“Unë jam për një teatër te ri, dhe i qëndroj deklaratave te mia, por jo ne dhunim te ligjeve, kolegeve, miqve e shokëve te mi!” shkruan Raimonda Bulku.
Ajo nuk ka dashur që fjala e saj të keqpërdoret në debatin e nxehtë të këtyre ditëve i cili kulmoi dje me një përplasje mes policisë dhe artistëve ku nuk munguan edhe incidentet e dhunës së ushtruar ndaj këtyre të fundit.
Aktorja e njohur shpreh solidaritetin e saj me kolegët duke shkruar se ndodhet larg dhe “me vjen keq qe mungoj te jem mes kolegesh ne teatër”.
“Une jam per nje teater te ri, dhe i qendroj deklaratave te mia, por jo ne dhunim te ligjeve, kolegeve, miqve e shokeve te mi! Respekto traditen! Ruaje historine! Nderto teater te ri, jo duke shkulur te vjetrin! Jam larg dhe me vjen keq qe mungoj te jem mes kolegesh ne teater …!!!! Ne krahet e mi mbaj mbesen time qe me mrekullon dhe deshiroj qe te behet aktore teatri….!!!” shkruan Raimonda Bulku. /Opinion.al
