Akademia e Shkencave ka deklaruar sot se më 19 korrik do të organizojë një mbledhje të jashtëzakonshme të Asamblesë së saj për tu njohur me dekretin nr. 11223 të Presidentit Meta dhe shqyrtimin e Këshillit Ekzekutiv për të konsideruar emërimin e Skënder Gjinushit në krye të saj.
Ky vendim u mor sot nga mbledhja e Këshillit Ekzekutiv të Akademisë së Shkencave. Reagimi vjen pas shpalljes së dekretit të Presidentit të Republikës i cili refuzoi emërimin e Skënder Gjinushit në krye të Akademisë së Shkencave. Argumentet e presidentit ishin se procesi zgjedhor ishte zhvilluar në kushte paligjshmërie pasi Gjinushi rezultonte në të njëjtën kohë kryetar i Partisë Socialdemokrate.
“Njoftim për mbledhje të jashtëzakonshme të Asamblesë së ASH
Këshilli Ekzekutiv i ASH u mblodh sot më datë 13 korrik 2019 dhe vendosi që më datë 19 korrik 2019, ditën e premte, në orën 11.00 të bëhet mbledhja e jashtëzakonshme e Asamblesë së Akademisë së Shkencave të Shqiperisë me këtë rend dite:
– Njohja me Dekretin e Presidentit të Republikës nr. 11223, datë 11.07.2019, dhe shqyrtimi i propozimit të Këshillit Ekzekutiv drejtuar Asamblesë për të kërkuar rikonsiderimin e emërimit të Kryetarit të zgjedhur nga kjo Asamble” shkruhet në njoftimin e Akademisë së Shkencave. /Opinion.al
