Komisioni Qendror i Zgjedhjeve ka pranuar 37 nga 38 ankesat e depozituara nga Bindja Demokratike, për zgjedhjet e 30 qershorit.
Ankesat e Bindjes Demokratike u pranuan me pesë vota pro për 38 Bashki. Sipas anëtarëve të KQZ, ankesa e BD është brenda kuadrit ligjor, por deri më tani kjo forcë politike nuk ka paraqitur prova konkrete për të vërtetuar shtimin e fletëve të votimit në mënyrë fiktive.
Deri më tani e vetmja kërkesë e cila nuk do të shqyrtohet nga Komisioni Qendror i Zgjedhjeve në seancë, ka qenë ajo e Vlorës.
“Kjo është sjellë tre ditë përpara se të merrej vendimi. Ku e dinin ata se do ta miratonim tabelën ne, po të mos e kishim miratuar tabelën”, tha anëtari i KQZ, Skënderaj. Ndërsa kreu i KQZ, Zguri u shpreh: “Pamundësia e KQZ për të arritur kuorumin, le të njoftohet subjekti në fjalë dhe le të kërkojë zgjidhje ligjore në Kolegj”.
Po ashtu, gjatë relatimin të 38 kërkesave të Bindjes Demokratike, në mbledhjen e KQZ kanë qenë të pranishëm dhe dy vëzhgues të OSBE-së./ Opinion.al E.Xh.
