‘Pse duhet shkarkuar Ilir Meta’ hapi fjalën e tij në Kuvend deputeti Kujtim Gjuzi gjatë debatit në seancën për ngritjen e komisionit hetimor për presidentin.
Këtë herë Gjuzi listoi të mënyrë të organizuar 6 argumente pro shkarkimit të presidentit. Së pari ai tha se Meta duhet shkarkuar pasi ka përgjegjësi për thesarin e arit në Kërrabë. Me këtë ai i referohet vjedhjes që i ndodhi thesarit në vitin 1996. Pra argumentet e deputetit të partisë Konservatore shtrihen në një hark kohor prej 23 vitesh, pavarësisht se presidenti ka 2 vite që është zgjedhur.
Kujtim Gjuzi shtoi se presidenti duhet shkarkuar për ‘grabitjen e mandateve në 2001, për ndikimin në Nikël dhe më në fund ai erdhi në 2019 duke thënë se Meta duhet shkarkuar pasi ka dekretuar 2 data zgjedhjesh. Sipas tij arsyeja se përse 85% e shqiptarëve nuk votuan në 30 qershor, është pikërisht për faj të presidentit Meta dhe gjeneral Gadafit (i referohet kryeministrit Rama).
Në fund të fjalës së tij ai i bëri thirrje mazhorancës për të kërkuar falje që zgjodhën Ilir Metën president.
“Ilir Meta pse duhet shkarkuar. Ai ka përgjegjësi për thesarin e Kërrabës, për grabitjen e mandateve në 2001 me Dushkun e famshëm. Ka pas ndikim në Nikël deri sa erdhën kë Kuvend deputetë të tjerë të opozitës. Ka çeduar me dy data zgjedhjesh. 85% e shqiptarëve nuk kanë ditur çfarë të bëjnë se çfarë thotë presidenti dhe çfarë thotë gjeneral Gadafi(kryeministri). Ju duhet të thoni na falni se zgjodhëm Ilir Metën”, tha Gjuzi.
